Astana avtobýstarynda jańa tártip: Valıdator isten shyqsa, jolaýshy tegin júredi

Atap aıtqanda, 21 shildeden bastap qalaishilik avtobýstarda qolma-qol aqshasyz elektrondyq kartamen tóleý 90 teńgeni quraıtyn bolady. Elektrondy kartalardy satyp alyp úlgermegender kondýktorǵa qolma-qol aqshamen 180 teńge tóleıdi. Sondaı-aq jolaýshylar men bagajdy qoǵamdyq ekspress kólikpen tasymaldaý qolma-qol aqshamen 250 teńgeni quraıdy.

Bul rette, elektrondy tólemdi qabyldaıtyn valıdatorlar jumys istemeı tursa, jolaýshylar avtobýsta tegin júrýge quqyly.

Ózgermeli tarıftiń engiziletini bir aı buryn habarlansa da, karta alyp úlgermegen jolaýshylar jeterlik. Sol sebepti, karta satatyn avtomattar qasynda kezek kóp.

Astana LRT Naýat Azanbaevanyń habarlaýynsha, jolaqy tóleý tártibiniń ózgerýine baılanysty búgin karta satatyn árbir avtomattyń qasynda keńesshi jumys isteıdi jáne olar halyqqa karta satyp alýdy, teńgerimdi toltyrýdy úıretedi.




«Aqsha tolyp qalǵan jaǵdaıda ınkassatorlar kelip jumys isteıdi, oǵan shamamen 15-20 mınýt ýaqyt ketedi. Odan basqa esh másele týyndamaıdy dep baǵamdap otyrmyz. Qazir qaladaǵy 30 termınal 100% jumys istep tur. Astana LRT mamandary baqylaý jasap otyr», - dedi Naýat Azanbaeva QazAqparat tilshisine bergen suhbatynda.

Kompanııa ókiliniń aıtýynsha, avtobýs ishindegi kondýktorlar endi Elektrondyq tóleý júıesiniń keńesshisi dep atalady jáne olardan kólik kartasyn qolma-qol aqshaǵa satyp alýǵa bolady.

«Kúnniń alǵashqy jartysynda avtobýs ishindegi keńesshiler 30 myń karta satyp úlgerdi. Al termınal men kassalardyń nátıjesi keshke daıyn bolady. Kartany arnaıy kassalarda jáne avtomattarda nemese Qiwi termınaldary arqyly toltyrýǵa bolady», - dep óz sózin tolyqtyrdy Naýat Azanbaeva.

Jolaýshylardyń qoǵamdyq kólikten minip-túsý tártibin ázirge eshkim ustanyp jatqan joq. Adamdar ózine yńǵaıly esikten kirip-shyǵyp júr. Al Elektrondyq tóleý júıesiniń keńesshileri (kondýktorlar) baıaǵydaı qolma-qol aqshamen eseptesip, jolaýshylardyń elektrondy kartasyn tekserýde.