Astana avtobýstarynda tegin júretinderdiń kartalaryna saraptama júrgiziledi

NUR-SULTAN. QazAqparat – Nur-Sultan qalalyq máslıhatynyń hatshysy Erlan Kanalımov áleýmettik az tamtylǵan topqa kiretin turǵyndardyń qoǵamdyq kólikte tegin júrý kartalarynyń paıdalanylýyna saraptama júrgizýdi tapsyrdy, dep habarlaıdy QazAqparat tilshisi.

«Bizde qala boıynsha jeńildigi bar jol júrý kartasyn shamamen 120 myń adam paıdalanady. Qalaı degende de, valıdatsııa boıynsha saraptama júrgizýdi tapsyrar edim. Óıtkeni, qalada kópshiligi halyqtyń az qamtylǵan toby retinde esepte turǵanymen qoǵamdyq kólikpen jıi júre bermeıdi. Osyǵan oraı saraptama jasap, esebi boıynsha is júzinde tólem jasaýdy ótinemin. Sebebi bul bıýdjet aqshasy. Eger adamdar kartany paıdalanbasa, oǵan nesine tólem jasaımyz», - dedi ol elorda máslıhatynyń áleýmettik-mádenı damý máseleleri jónindegi turaqty komıssııasynyń otyrysynda.

Osy oraıda Nur-Sultan qalalyq Jumyspen qamtý jáne áleýettik qorǵaý basqarmasy basshysynyń mindetin atqarýshy Ilıa Skýb STC kompanııasy is júzinde 3 mlrd teńgeniń valıdatsııasy jasalǵany týraly esep beretindigin jáne ol tizimmen saı keletindigin aıtty.

«Olardyń barlyǵy birdeı kartany paıdalanbaıtyndyǵy túsinikti. Biraq, kúnine birneshe ret qoǵamdyq kólikpen qatynaıtyndar bar. Olar (STC kompanııasy) qalaı bolǵandada da atalǵan somany tolyq ıgeredi», - dedi Ilıa Skýb.

Aıta keteıik, komıssııa otyrysynda Ilıa Skýb elordada áleýmettik jaǵynan az qamtylǵan tulǵalar qoǵamdyq kólikte tegin júrýi úshin 3 mlrd teńge bólinetindigin aıtqan bolatyn.