Astana avtobýstarynda kondýktorlar konsýltanttardyń qyzmetin atqarady
ASTANA. QazAqparat - Astanadaǵy qoǵamdyq kólikter elektrondy tólem júıesine aýysqan alǵashqy ýaqytta kondýktorlar konsýltanttardyń qyzmetin atqarady. Bul týraly «QazAqparat» tilshisimen áńgimelese otyryp, «Astana LRT» JShS-nyń baspasóz hatshysy Aıgúl Jamalova aıtyp berdi.
«Qoǵamdyq kólikter elektrondy tólem júıesine aýysqan soń, qalanyń barlyq kondýktorlary jumyssyz qalady dep oılaıdy. Biraq, senimdi túrde bulaı bolmaıtynyn málimdeımiz. Alǵashqy ýaqytta olar konsýltanttardyń qyzmetin atqarady», - dedi A.Jamalova.
Onyń aıtýynsha, kondýktorlar Astana qalasyndaǵy mamandardy qaıta daıarlaý ortalyǵynda qaıta daıarlaýdan ótedi eken. «Osy ortalyq mamandarynyń kómegimen árbir kondýktor uqsas mamandyqtaryna qaıta daıarlanady. Bálkim, bizdiń basqa da jobalarymyzdyń aıasynda jumysqa qabyldanady. Qazirdiń ózinde baıqaǵanymyzdaı, keıbir kondýktorlardyń kólik júrgizgen tájirıbesi bar. Barlyq kondýktorlarǵa osyndaı jumystar usynamyz. Eń bastysy, bir kúnde barlyq kondýktordy jumyssyz qaldyrmaımyz», - dedi ol.
Onyń aıtýynsha, Astana qalasynyń qoǵamdyq kólikterinde elektrondy tólem júıesi 2015-2016 jyldary engiziledi.
