Astana avtobýstarynda kondýktor bolmaıdy
ASTANA. QazAqparat - Shilde aıynyń sońyna deıin elordanyń qoǵamdyq kólikterinde saralanǵan tarıf engiziletin bolady. Bul týraly búgin Astananyń Qoǵamdyq keńesinen keıin «Astana LRT» JShS-niń basqarma tóraǵasy Bekmyrza Igenberdınov aıtty, dep habarlaıdy QazAqparat tilshisi.
«Jańa júıe engizilgennen keıin kondýktorlardy avtomatty túrde alyp tastaý josparlanǵan. Degenmen, buǵan deıin kondýktorlardy odan ary jumysqa ornalastyrý máselesi aıtylǵan bolatyn. Jelide birinshi jyl jumys istep júrmegen kásibı mamandar avtobýs parkiniń baqylaý jelisine nemese kóliktik baqylaý qyzmetine jumysqa ornalastyrylady», - dedi ol BAQ ókilderine bergen suhbatynda.
Onyń aıtýynsha, elordanyń avtobýs parkterinde myńnan astam kondýktor jumys isteıdi.
«Al saralanǵan tarıfti shilde aıynyń sońyna deıin mindetti túrde engizemiz de jyldyń sońyna deıin saralanǵan tarıfke saraptama júrgizemiz. ıAǵnı, saralanǵan tarıf bizge jolaýshylar aǵynyna tolyq ári túsinikti saraptama júrgizýge múmkindik beredi», - dedi ol.
Aıta keteıik, saralanǵan tarıf engizilgen kezde qoǵamdyq kólikte jol júrý quny kólik kartasymen tóleý kezinde 90 teńgeni quraıdy. Al qoǵamdyq kólikti jıi paıdalanbaıtyn nemese karta alýdy qajet dep eseptemeıtinder úshin jol júrý quny 180 teńge bolady.
