Astana avtobýstarynda adamnyń bet-álpetin tanıtyn tehnologııalar engiziledi
ASTANA. QazAqparat - «Sergek» júıesi Astanadaǵy qylmystylyqty tómendetýge yqpal etti. Bul týraly «Nur Otan» partııasynda ótken dóńgelek ústel otyrysynda «Astana Innovations» AQ basqarma tóraǵasynyń orynbasary Serik Qusaıynov málim etti, dep habarlaıdy QazAqparat.
«2017 jyldyń qyrkúıeginen Astana joldarynda «Sergek» beıne baqylaý kameralary iske qosylyp, óziniń tıimdiligin dáleldedi. Atap aıtqanda, qoǵamdyq oryndarda, shahar kóshelerinde jol-kólik oqıǵalary men qylmystar sany aıtarlyqtaı tómendep, júrgizýshilerdiń ereje talaptaryn saqtaýy joǵarylady», - dep toqtaldy kompanııa ókili.
Budan bólek ol adamnyń bet-álpetin tanıtyn júıeniń jumysyna da toqtalyp ótti.
«Bizdiń kompanııa qaýipsizdikti qamtamasyz etý úshin avtobýstarda, vokzaldarda, úıdiń kireberisterinde adamnyń bet-álpetin tanıtyn tehnologııany engizý boıynsha jumys isteýde. Qanatqaqty joba retinde Astana ákimdiginde osy júıe ornatyldy»,- dep naqtylady S. Qusaıynov.
Onyń aıtýynsha, byltyrmen salystyrǵanda «Sergek» kamerasyn ornatý orta eseppen alǵanda qylmys sanyn 30 paıyzǵa tómendetken. Mysaly, 2017 jyldyń alǵashqy eki aıynda 6 391 qylmys jasalsa, al bıyl 4 384 zańsyz áreket tirkeldi.
«Sonymen qatar atalǵan foto-beınetirkeý júıesi arqyly 523 qylmystyń beti ashyldy. Olardyń arasynda kisi óltirýge qatysty oqıǵalar, qaraqshylyq, urlyq jáne basqa da qylmystar bar. Jalpy, kameralar osyǵan deıin beıne baqylaý júıesi bolmaǵan jerlerde ornatylyp jatyr»,- dedi Serik Qusaıynov.
Foto: alrt.kz
