Astana avtobýstary tegin WI-FI-men jaraqtalýda
ASTANA. QazAqparat - Astana qalasyndaǵy qoǵamdyq kólikter ınternetke qosylýda, dep habarlaıdy tv7.kz.
Búgingi ýaqytta tegin WI-FI tek 12 avtobýsta ornatyldy. Bolashaqta olardyń sanyn edáýir kóbeıtý josparlanýda.
«Bizdiń joba qoǵamdyq kóliktiń yńǵaılylyǵyn jáne jaılylyǵyn joǵarylatýǵa úlken septigin tıgizedi. Bul bastama «Smart Astana» atty iri jobanyń bir bólshegi. Ol elordalyqtarǵa jáne qala qonaqtaryna keńjolaqty ınternetti qoljetimdi etýge baǵyttalyp otyr», - deıdi «Smart Astana» departamentiniń bas menedjeri Aıbek Sadyqov.
Joba avtorlarynyń sózine qaraǵanda, vaı-faıdyń jyldamdyǵy sekýndyna 25 Mbıt jáne odan joǵary. Endi avtobýstaǵy jolaýshylar ýaqyttaryn bos ótkizbeı, áleýmettik jelilerge kirip, onlaın kitaptardy oqyp otyra alady. Ázirge medıafaıldar kóp júkteledi. Alaıda jasaqtaýshylar ınternettiń jyldamdyǵyn joǵarylatatyndyqtaryn aıtýda.
«Biz kúnine qansha paıdalanýshy bolǵanyn sanap, statıstıkany jasap otyramyz. Árbir paıdalanýshy qansha trafık qoldandy, qandaı qurylǵy qoldandy - Android nemese iOS. Avtobýstardaǵy ınternet - tegin. Degenmen paıdalanbas buryn olarǵa ár jarty saǵat saıyn 15 sekýndtyq jarnama kórsetiledi», - deıdi joba jasaqtaýshysy Tóreǵazy Ábdiqulov.
