Astana aýrýhanasynda menıngıt juqtyrdy degen kúdikpen úsh naýqas jatyr
ASTANA. QazAqparat - Astana juqpaly aýrýlar aýrýhanasyna «menıngokokk ınfektsııasy» bolýy múmkin degen dıagnozben túsken naýqastardyń jaǵdaıy týraly elimizdiń bas memlekettik sanıtarlyq dárigeri Jandarbek Bekshın málim etti, dep habarlaıdy QazAqparat tilshisi.
«Jyl basynan beri menıngokokk ınfektsııasy rastalǵan 60 jaǵdaı boldy. Búginde 27 naýqas jazylyp shyqty. 20 naýqas emdelip jatyr. Onyń 13-i Almatyda, úsheýi - Astanada (2 eresek, 1 bala). Astanadaǵy naýqastar boıynsha - eń birinshi bolyp A. esimdi azamat aýyrǵan. Ol 5 maýsymda naýqastanyp, 6 maýsymda qalalyq juqpaly aýrýlar aýrýhanasyna tústi. Ol jerde naýqasqa «menıngokokk ınfektsııasy» bolýy múmkin degen dıagnoz qoıylǵan. Bizde bakterıologııalyq zertteýlerdiń nátıjesi alynǵannan keıin (4-5 táýlik) dıagnoz rastalmaıtyn jaǵdaılar boldy. Ekinshi jaǵdaı - M. esimdi azamatsha 6 maýsymda osyndaı dıagnozben aýrýhanaǵa tústi. Ol budan buryn aýyryp bastaǵan. Aýrý belgileri ádettegideı, basy aýyrǵan, qyzýy kóterilgen, tamaǵy aýyryp, denesinde bórtpeler paıda bolǵan. Ol qazir em qabyldap jatyr. Biz bakterıologııalyq zertteýlerdiń nátıjesin kútip otyrmyz. Bir naýqas jansaqtaý bóliminde. Biraq, qazirgi tańda jaǵdaı turaqty, júıeli túrde em alyp jatyr», - dep habarlady QR DSM Qoǵamdyq densaýlyq saqtaý komıtetiniń tóraǵasy, bas memlekettik sanıtarlyq dáriger Jandarbek Bekshın OKQ baspasóz máslıhatynda.
