Astana áýejaıynyń prezıdenti qala ákiminiń syn eskertpesinen keıingi atqarylǵan jumystardy baıandady
ASTANA. QazAqparat - Búgin Astana qalasy ákimi Ádilbek Jaqsybekovtiń tóraǵalyǵymen kezekti apparat keńesi ótti. Onda qalalyq kommýnaldyq qyzmetterdiń jumystary qaralyp, kásipkerlerdi qoldaýdyń naqty sharalary talqylandy, dep habarlady astana.gov.kz.
- Memleket basshysynyń tapsyrmasyna sáıkes Qazaqstan halqy Assambleıasynyń 20 jyldyǵyna oraı Naýryz meıramy men Birlik kúnin merekeleýdi uıymdastyrýdy qazirden bastap qolǵa alý kerek. Budan basqa, Astananyń ınvestıtsııalyq tartymdylyǵyn arttyrý, shaǵyn jáne orta bıznesti tıimdi qoldaý boıynsha jumystardy jalǵastyrý qajet, - dedi Ádilbek Jaqsybekov. Buǵan deıin ótken apparat keńesteriniń birinde elorda ákimi qalalyq áýejaıdyń jumysyn synǵa alǵan bolatyn. Á. Jaqsybekovtiń atap ótýinshe, tólqujat jáne keden qyzmetteriniń jumysy qanaǵattanarlyqsyz, tarıfter joǵary jáne qyzmet kórsetý sapasy tómen. Bul jolaýshylar tarapynan kóptegen narazylyqtar týdyrady. Osy oraıda búgin Astananyń halyqaralyq áýejaıynyń prezıdenti Qaırat Jaýhanov oryndalǵan jumystarǵa toqtaldy. Atap aıtqanda, kedendik baqylaýsyz keletin jolaýshylarǵa «jasyl aımaq» arqyly ótý qamtamasyz etildi. Aldaǵy ýaqytta qalalyq áýejaıdyń jumysyna halyqaralyq deńgeıdegi sapa standarttary engiziletin bolady. Negizinen, qyzmet kórsetý salasyna basymdyq berilmek, jolaýshylar termınalyn qaıta qurý josparlanǵan. Munymen qosa, jolaýshylarǵa qyzmet kórsetý servısi ózgertiledi, áýejaı aýmaǵynda jumys isteıtin kásiporyndarǵa áldeqaıda qatań talaptar qoıylatyn bolady.
