Astana áýejaıynyń ótkizý qabileti jylyna 7,7 mln jolaýshyǵa deıin artady
ASTANA. QazAqparat - Búgin QR Premer-Mınıstriniń Birinshi orynbasary Asqar Mamın Astana qalasyndaǵy halyqaralyq áýejaıdyń qurylys jumystaryn tekserip, jańa termınaldy salý jáne ushý-qoný jolaǵyn qaıta jóndeý barysymen tanysty. Bul týraly primeminister.kz habarlady.
«Nurly jol» memlekettik baǵdarlamasy aıasynda salynyp jatqan nysan elordanyń áýe aılaǵynyń ótkizý qabiletin jylyna 3 mln-nan 7,7 mln jolaýshyǵa deıin arttyrýǵa múmkindik beredi, bul ásirese EKSPO-2017 qarsańynda ózekti.
Qurylys kestege saı júrip jatyr, áýejaıdyń jańa termınalynyń qańqasy turǵyzyldy, shatyr jumystary aıaqtaldy, qasbetti, ınjenerlik kommýnıkatsııalardy montajdaý, ǵımaratty ishki árleý, perrondy qurý jumystary júrgizilip jatyr.
Nysan jańa tehnologııalarmen jabdyqtalǵan, bul qyzmet kórsetýdi aıtarlyqtaı jaqsartyp, avıatsııalyq qaýipsizdikti arttyrady.
Atalǵan nysan qurylysyn 2017 jyldyń birinshi toqsanynyń sońynda aıaqtaý josparlanǵan.
