Astana áýejaıynyń qyzmetkerleri Golovkınmen oryn alǵan jaıtqa baılanysty tártiptik jazaǵa tartyldy
ASTANA. QazAqparat - Astana halyqaralyq áýejaıynyń marketıng jáne qoǵammen baılanys qyzmeti jýyrda oryn alǵan Gennadıı Golovkınmen baılanysty oqıǵaǵa qatysty málimdeme jasady.
«2015 jyly 24 shildede Lıýftganza áýe kompanııasynyń reısimen Frankfýrttan Astana áýejaıyna qazaqstandyq boksshy Gennadıı Golovkın ushyp keldi. Oǵan deıin áýejaıǵa telefon boıynsha aldyn ala tólemsiz G.Golovkınge VIP zal arqyly qyzmet kórsetý týraly ótinish kelip túsken.
Qyzmet kórsetý boıynsha nusqaýǵa sáıkes VIP zalda jolaýshylarǵa qyzmet kórsetý aqyly. Tólemdi ushyp kelgenge deıingi ýaqytta jasaý kerek. Jeńildik arqyly qyzmet kórsetiletin QR jáne shetel laýazymdy tulǵalarynan bólek basqa tulǵalar tólem tóleýi tıis. Áýejaı tarapynan onyń agenti tólem týraly faktini teksermeı, qonaqqa VIP zalda qyzmet kórsetýde aǵattyq jiberdi. Ótinish bildirýdiń aldyn ala tólem jasamaýy men agenttiń qateligi keleńsiz jaǵdaıǵa ákelip soqty. VIP zalda jolaýshylarǵa qyzmet kórsetetin áýejaı qyzmetkerleri jolaýshylarǵa qyzmet kórsetý boıynsha basshylyq talaptaryn buzǵany úshin tártiptik jazaǵa tartyldy. «Astana halyqaralyq áýejaıynyń ákimshiligi bul oqıǵaǵa baılanysty G.Golovkınnen keshirim surady», - delingen elorda áýejaıynyń baspasóz qyzmetiniń habarlamada. Eske sala keteıik, «Astana» halyqaralyq áýejaıynyń qyzmetkeri Gennadıı Golovkındi VIP-zal arqyly ótkizbeı, jolaýshylar men Gennadııdi kútip alýshylardyń aldynda janjal shyǵarǵan. Ol «Gennadıı aqsha tólemeı zal arqyly ótýge quqyǵy joq, sebebi ol sheneýnik, ne sheneýnik otbasynan emes» degen. Bul Qazaqstannyń bedelin shetelde kóterip júrgen Golovkınniń aınalasyndaǵy adamdardyń narazylyǵyn týdyrǵan.
