Astana áýejaıyndaǵy jolaýshylar aǵyny ótken jyly 2 mıllıon adamnan asty
ASTANA. 24 qańtar. QazAqparat - Astana áýejaıy qyzmetiniń qorytyndysy boıynsha jolaýshylar aǵyny 2013 jyly 2609431 adamdy qurady, bul ótken jylmen salystyrǵanda 15% artyq,
dep habarlaıdy astana.kz atalmysh áýejaıdyń resmı portalynda jazylǵan.
2013 jyly ishki baǵyttar boıynsha jalpy jolaýshylar aǵyny 1630666 adamdy (2012 jylmen salystyrǵanda 9% kóp) qurady. Іshki reısterde Almaty, Shymkent jáne Atyraý baǵyttary asa kóp suranysqa ıe. Al halyqaralyq baǵyttarda 978765 jolaýshyǵa qyzmet kórsetilgen, bul 2012 jylǵy kórsetkishterge qaraǵanda 21% artyq. Suranysqa ıe baǵyttar - Ábý-Dabı, Ystambul.
«Óndiristik kórsetkishterdiń ósýiniń negizgi faktorlary - bar reısterdiń jıiliginiń kóbeıýi jáne jańa baǵyttardyń ashylýy bolyp tabylady», - delingen habarlamada.
2013 jyly Astana áýejaıynan alǵash ret London, Krasnoıarsk, Bangkok qalalaryna baǵyttar ashyldy. Sondaı-aq, Goa (Úndistan) jáne Rodos (Grekııa) baǵyttary boıynsha charterlik týrıstik baǵdarlama jasaldy.
2013 jyly qyzmet kórsetilgen reısterdiń sany 20272, bul 2012 jylǵy sáıkes kezeńmen (17499 reıs) salystyrǵanda 16% kóp. Sonymen qatar, turaqty reıster is júzinde 16% kóbeıse, keshigýler 1% tómendegen.
Usynylǵan áýejaı qyzmetteriniń sapasy men qaýipsizdik deńgeıi IKAO halyqaralyq standarttaryna sáıkes keledi.
