Astana áýejaıyndaǵy dúkender men dámhanalardyń baǵasy arzandaıdy - basqarýshy kompanııa
ASTANA. QazAqparat - Astana áýejaıyndaǵy dúkender men dámhanalardyń baǵalary tómendetiledi. Bul týraly búgin Ortalyq kommýnıkatsııalar qyzmetinde ótken brıfıngte «Airport Management Group» JShS Bas dırektorynyń orynbasary Asqar Muratbaev aıtty.
«2014 jylǵa deıin bizdegi zańnamalarda avıatsııalyq emes kommertsııalyq qyzmettiń tabysy avıatsııalyq qyzmet tabysynyń 5 paıyzynan aspaýy tıis degen retteýler boldy. Sondyqtan áýejaılar úshin óziniń aýmaǵyndaǵy dúkender men dámhanalardy damytýdyń eshbir qajeti bolmady, óıtkeni olarǵa monopolııaǵa qarsy organdardyń tarapynan únemi aıyppuldar salynyp otyrdy», - dep túsindirdi ol jýrnalısterdiń suraqtaryna jaýap berý kezinde.
Onyń aıtýynsha, qazir áýejaı aýmaǵyndaǵy barlyq ekonomıkalyq qyzmet kórsetý salasynyń qatysýshylaryna qoıylǵan ortaq talaptar boıynsha baǵalardy túsirýge múmkindik týyp otyr.
«Biz budan bylaı áýejaı aýmaǵyndaǵy barlyq qyzmet kórsetý naryǵynyń qatysýshylaryna birdeı talaptar qoıa alamyz. Sondyqtan baǵa týraly másele bizdiń basty nazarymyzda. Bıylǵy jyldyń birinshi jartysyna deıin Astana áýejaıyndaǵy baǵalar tolyq retteledi. Bul sharalar jolaýshylarǵa tikeleı qyzmet kórsetetin barlyq qatysýshylarǵa jasalady», - deıdi ol.
