Astana áýejaıynda jeti ushaqtyń reısi keshiktirilýde
ASTANA. QazAqparat - Aýa raıynyń qolaısyzdyǵyna baılanysty Astana áýejaıynda 7 ushaqtyń reısi keshigip jatyr, dep habarlady «Astana» halyqaralyq áýejaıy» AQ marketıng jáne qoǵammen baılanys bóliminiń basshysy Lıýdmıla Kopeıchýk.
«Astana áýejaıynda aýa temperatýrasy 12 gradýsty kórsetýde. Kóriný deńgeıi - 150 metr, jeldiń jyldamdyǵy sekýndyna - 23 metr. Qazir Astana áýejaıynda 7 ushaqtyń reısi bógelýde. Ushyp ketý baǵytyndaǵy 3 reıs keıinge qaldyrylsa, 4-eýi - ushyp kelýi tıis reıster. Olar Petropavl men Semeıge ushatyn «Skat» avıakomanııasy men Ekaterınbýrgke ushatyn «Eır Astana» avıakompanııasynyń reısteri. Úrimshiden keletin «Chaına Saýzen Eırlaınz» avıakompanııasy, Aqtóbeden keletin «Skattyń», Taldyqorǵannan «Jetisý» avıakompanııasy, Óskemennen «Eır Astana» reısteri keshigýde», dep habarlady L.Kopeıchýk.
Onyń aıtýynsha, bógelis ýaqyty jarty saǵattan 7 saǵatqa deıin sozylýda. Taldyqorǵannan keletin reısti jolaýshylar saǵat 10:10-nan 17:20-ǵa deıin kútýge májbúr. L.Kopeıchýktiń habarlaýynsha, Astana áýejaıy shtattyq rejimde jumys jasap jatyr.
