Astana áýejaıynda tumaý qaýpin joıý úshin baqylaý kúsheıtildi
ASTANA. QazAqparat - Astana qalasynyń qoǵamdyq densaýlyq saqtaý basqarmasynyń basshysy Sádýaqas Baıǵabylov elordadaǵy tumaý juqtyrý qaýpine qatysty jaǵdaıdy túsindirdi, dep habarlaıdy QazAqparat tilshisi.
Onyń aıtýynsha, 2019 jyldyń basynan beri Astana qalasynda 29 adam, sonyń ishinde 8 bala tumaýmen aýyrǵan. Onyń bári de medıtsınalyq uıymdarǵa ýaqtyly baryp, emdelý kýrsynan ótýdiń arqasynda aýrýdy asqyndyrmaı, aldyn aldy.
DDU-nyń usynystary boıynsha tumaý taraǵan kezde jaǵdaıdy tıisti deńgeıde ustap turý úshin halyqtyń keminde 10 paıyzy vaktsınatsııadan ótýi kerek. Sol sebepti, elordada bul kórsetkishke qol jetkizý úshin 126 723 adamǵa ekpe jasalǵan.
«Astanalyqtarǵa alys-jaqyn shet elderge sapar josparlaý kezinde sol elderdegi juqpaly aýrýlardyń taraýy boıynsha jaı-kúıdi bilip alý kerektigin eskertemiz. Mysaly, Grýzııada tumaýǵa shaldyǵý deńgeıi joǵary. Onda mektepter karantınge jabylyp jatyr. Tbılısı men Astana arasyndaǵy turaqty reısterdiń baryn eskere otyryp, Astana qalasyna tumaý vırýsyn engizý qaýpin joıý úshin áýejaıda sanıtarlyq-karantındik baqylaý kúsheıtildi. Medıtsınalyq teledıdardyń kómegimen ekıpaj múshelerin qosa alǵanda, Grýzııadan kelip jatqan áýe jolaýshylarynyń baılanyssyz termometrııasy (temperatýrany ólsheý) júzege asyrylady. Bári de tekserýden ótip jatyr. Jolaýshylardyń tumaýǵa shaldyǵý jaǵdaıy anyqtalǵan joq», - deıdi Sádýaqas Baıǵabylov
Qoǵamdyq densaýlyq saqtaý basqarmasy jaǵdaı turaqty ekenin aıtyp otyr. Astanada tumaýǵa shaldyqqan jaǵdaılar bolsa, Sádýaqas Baıǵabylovtyń myna nómirine habarlasýǵa bolady: +77780127000
