Astana áýejaıynda tegin kólik qoıý ýaqyty qysqardy
ASTANA. QazAqparat - Astanadaǵy «Nursultan Nazarbaev» halyqaralyq áýejaıynyń avtoturaq tarıfteri ózgerdi, dep habarlaıdy QazAqparat «Astana LRT» kompanııasyna silteme jasap.
Áýejaıdyń arnaıy jelisine kólik qoıýdyń alǵashqy 15 mınýty - tegin. Ýaqyt sheginen asyp ketken jaǵdaıda, avtojúrgizýshi arnaıy jolaqta turýdyń árbir kelesi saǵaty úshin 1000 teńgeden tóleıdi», - dep habarlady «Astana LRT» kompanııasynyń baspasóz qyzmeti.
Kompanııanyń málimdeýinshe, mundaı tarıf ózgerisi halyqaralyq tájirıbede bar.
«Avtoturaq aımaǵynyń arnaıy jol jelisinde ruqsat etilgen tegin turý ýaqyty - 15 mınýtqa deıin. Eýropa elderinde eń az tegin turý ýaqyty qoldanylady nemese tegin ýaqyt degen bolmaıdy. Salystyrmaly túrde TMD elderinde tegin turý ýaqyty kópteý. Máselen, Kıev áýejaıynda - 10 mınýt, máskeýlik «Sheremetevo» men «Domodedovoda» - 15 mınýt, Sankt-Peterbýrgtegi «Pýlkovo» áýejaıynda - 15 mınýt», - dep atap ótti kompanııa.
Jolaýshylardy jetkizý úshin bólingen arnaıy jolaq 2018 jyldyń 21 shildesinde iske qosyldy.
Arnaıy jol jelisine Qabanbaı batyr dańǵylymen 6 shlagbaým arqyly kirýge bolady. Shyǵar tusta 5 shlagbaým bar. Avtoturaq aqysyn tóleýdi jeńildetý úshin arnaıy jol jelisinen shyǵar jerde 3 parkomat qoıylǵan. Taǵy 2 parkomat T1 termınalynda jáne T2 termınaly janynda ornatylǵan. Odan bólek, áýejaı avtoturaǵynyń birinshi qabatynda kassa jumys isteıdi.
Aıta keteıik, áýejaıdyń ortaq avtoturaǵynda turý tarıfteri de ózgerdi. Eger buryn alǵashqy 30 mınýtqa toqtaý tegin bolsa, qazir bul jeńildik alynyp tastaldy. ıAǵnı kólik ıesi turaqqa kirgen sátten bastap 10 saǵatqa deıin saǵatyna 100 teńge tóleıtin bolady. 10-shy saǵattan bastap, 24 saǵatqa deıin - 1000 teńge. Árbir kelesi táýligi - 500 teńge.
