Astana áýejaıynda reıster keshiktirilýde
ASTANA. QazAqparat - Nursultan Nazarbaev áýejaıynda reıster keshiktirilip, keıinge qaldyrylýda, dep habarlaıdy QazAqparat tilshisi.
Áýejaı saıtyndaǵy elektrondy tablo málimetterine sáıkes, tańerteńnen beri Air Astana kompanııasynyń Almatyǵa, sonymen qatar Qostanaıǵa saǵat 15-00-de ushyp ketýi tıis reısiniń keıinge qaldyrylǵany jarııalanǵan. Sondaı-aq «Bek Air» áýe kompanııasy da Astanadan Almatyǵa qatynaıtyn reısiniń keshiktiriletindigin habarlaǵan. Áýe kompanııasynyń málimetinshe, Z9-2121 reısiniń keshiktirilýine tehnıkalyq sebepter túrtki bolǵan.
«Qazirgi ýaqytta tehnıkalyq departament ushýdy múmkindiginshe jaqyn arada júzege asyrý úshin barlyq áreketti jasap jatyr. Jolaýshylar áýe tasymalyn oryndaý kóptegen faktorlarǵa táýeldi jáne biz sizderdiń saparlaryńyz qaýipsiz ári jaıly bolýy úshin barynsha kúsh-jiger jumsaımyz. Ushaq ushýynyń jańa ýaqyty jaıynda SMS arqyly qulaǵdar bolasyzdar. Keltirilgen qolaısyzdyqtar úshin keshirim ótinemiz», - delingen kompanııa taratqan aqparatta.
Munan bólek, Scat kompanııasy da 15-45-te ushyp shyǵýy tıis Shymkent baǵytyndaǵy reısti úsh saǵatqa keshiktirmek.
Al ushyp kelýlerge toqtalsaq, Air Astana kompanııasynyń Almatydan 10-30-da ushyp kelýi tıisti reısi keıinge qaldyrylyp otyr. Sondaı-aq dál osy kompanııanyń Úrimji men Pavlodardan kelýi tıis ushaqtary da keshigip jatyr. «Scat» kompanııasynyń da Shymkentten keletin reısi de keshigedi. «AtlasGlobal» áýe kompanııasynyń da Antalııadan keletin reısi de birshama ýaqytqa kesh kelip qonady.
