Astana áýejaıynda kólik turaǵynyń tarıfteri arzandady
ASTANA. QazAqparat - «Nursultan Nazarbaev» halyqaralyq áýejaıynyń avtoturaqtarynda qyzmet kórsetý sharalaryna ózgerister engiziledi, dep habarlaıdy QazAqparat.
Belgili bolǵandaı, R-3 aqysyz turaq ýaqytsha jabylyp, ol avtokólik qoıatyn basqa aımaqqa qaraı kóshirilmek.
«Áýejaı aýmaǵynda jumys isteıtin qyzmetter men uıymdar qyzmetkerlerine, sondaı-aq áýejaı personalyna qolaıly jaǵdaı jasaý maqsatynda, aqysyz R-3 turaǵy qurylys jumystaryna baılanysty jabylady. Osy oraıda bul avtokólik qoıatyn oryn ekige bólinip, qyzmettik turaq jasaqtalatyn bolady. Sonymen birge qala turǵyndary men qonaqtaryna arnalǵan tegin avtoturaq P-5, P-6, P-7 jáne P-8 aımaqtaryna kóshireledi», - dep atap ótilgen Astana LRT-nyń Facebook-tegi málimetinde.
Budan bólek, kólikterdi qoıǵan úshin jasalatyn tólem tarıfteri de ózgerdi.
«Búginde qoldanystaǵy tarıfke taldaý jasaı otyryp, sonymen qatar jobanyń barlyq qarjylyq quramdaýyshyn qaıta qaraý nátıjesinde R-1 turaq aımaǵynda tarıfterdi ózgertý boıynsha áýejaı basshylyǵymen tólem qunyn tómendetýge ýaǵdalastyq. Munymen qosa, Astanadaǵy halyqaralyq áıýejaıyndaǵy avtokólik qoıatyn keńistikti basqarýda túbegeıli ózgerister jasalady. Endi R-1 turaǵyna qysqa merzimge ǵana emes, sonymen qatar uzaq ýaqytqa da kólik qoıýǵa bolady. Sondyqtan bıylǵy 1 qazannan bastap tómendetilgen jańa tarıfter iske qosylady», - delingen habarlamada.
Jańa tarıftik kestege sáıkes, R-1 avtoturaǵy úshin tólem myna deńgeıde bekitildi:
- alǵashqy 30 mınýt aqysyz bolady;
- 30-dan tolyq 1 saǵatqa deıin - 300 teńge;
- 1 saǵattan eki saǵatqa deıin - 400 teńge;
- 2 saǵattan 3 saǵatqa deıin - 600 teńge;
- 3 saǵattan 24 saǵatqa deıin - 2 500 teńge (kólik 4 saǵat tursa da, bir táýliktiń tarıfi tólenedi)
- ótken ár táýlik úshin - 2 500 teńge.
