Astana áýejaıynda baǵasy qoljetimdi ashana ashyldy
ASTANA. QazAqparat - Nursultan Nazarbaev halyqaralyq áýejaıynda alǵash ret qoljetimdi baǵamen ashana ashyldy, dep habarlaıdy QazAqparat áýejaıdyń baspasóz qyzmetine silteme jasap.
Atalmysh tamaqtaný orny ishki baǵytqa qatynaıtyn jolaýshylar termınalynda ornalasqan.
Kelýshiler alǵashqy sátten-aq, jańa ashanada baǵanyń qoljetimdigine kóz jetkizedi. Máselen, mundaǵy ortasha baǵa bir adamǵa 1000 teńge shamasynda.
«Men Astana áýejaıyna alǵash ret kelip otyrmyn. Mundaǵy baǵa ózim turatyn Germanııamen salystyrǵanda edáýir arzan, tipti salystyrýǵa da kelmeıdi. Álemniń kóptegen áýejaılarynda tústik as anaǵurlym qymbat turady. Aıtalyq, basqa áýejaılardaǵy bir býterbrodtyń qunyna bul jerde birinshi, ekinshi tamaq jáne tátti shyryn ishýge bolady. Jolaýshylar úshin mundaı oryn óte qajet dep oılaımyn», - deıdi Vıktorııa Cherepanova.
«Jibek joly» ashanasy basshysynyń aıtýynsha, arzan baǵadaǵy dámdi taǵamdy usyný asa qıyn emes.
«Buǵan deıin áýejaıdaǵy kóptegen qyzmetkerler men jolaýshylardyń qymbat baǵamen tústenýge múmkindikteri bola bermeıtinine kóz jetkizdim. Al qazir kez kelgen adam osy jerde qoljetimdi baǵamen toıyp tamaqtana alady»,-deıdi ashana qojaıyny Jibek Malybaeva.
Nursultan Nazarbaev halyqaralyq áýejaıynyń basqarma tóraǵasy óz kezeginde ashananyń ashylýy, bir qaraǵanda qatardaǵy is bolǵanymen, onyń kópten kútken shara ekenin atap ótti.
«Biz jolaýshylar termınalynda kóp jyldan keıin ashana ashýǵa qol jetkizdik. Qoǵamdyq tamaqtaný ornyndaǵy qoljetimdi baǵa áýejaı ımıdjine de tikeleı baılanysty. Ashana ashýdaǵy mundaı áreket áýejaıdyń atrıbýtyna aınalýy kerek», - deıdi Rádilbek Ádımolda.
Budan buryn 270 sharshy metr aýmaqta meıramhana bolǵan edi. Keıinnen onyń ishi ashana úshin qaıta jabdyqtalyp, ishki mazmuny ózgertilip, jańa jabdyqtar ákelindi. «Jibek joly» ashanasynda kez kelgen ýaqytta tamaqtanýǵa bolady. 80 adamǵa laıyqtalǵan oryn táýlik boıy jumys isteıdi. Bolashaqta ashana aýmaǵyn keńeıtip, qosymsha oryn ashý josparda bar.
