Astana áýejaıynda apatty jaǵdaıda qonǵan «Bek Eır» ushaǵyna qatysty arnaıy komıssııa quryldy
ASTANA. QazAqparat - Búgin Úkimet úıinde QR Premer-Mınıstriniń Birinshi orynbasary Baqytjan Saǵyntaev Astana áýejaıynda «Bek Eır» áýe kompanııasynyń ushaǵyna qatysty oqıǵaǵa baılanysty keńes ótkizdi, dep habarlady QR Úkimet basshysynyń baspasóz qyzmetinen.
Jıynǵa Investıtsııalar jáne damý mınıstrliginiń, Bas kólik prokýratýrasynyń, ІІM, UQK ókilderi qatysty.
Investıtsııalar jáne damý mınıstrligi oqıǵanyń mán-jaıyn anyqtaıtyn arnaıy komıssııa qurdy. Oǵan shyǵarýshy zaýyt ókilderi men táýelsiz sarapshylar shaqyryldy.
Keńes qorytyndysy boıynsha, Baqytjan Saǵyntaev osy syndy áýe apatynyń aldyn alý boıynsha sharalardy qabyldaýdy tapsyrdy.
Azamattyq avıatsııa komıtetine múddeli memlekettik organdarmen birlesip, «Bek Eır» AQ ushý qaýipsizdigi deńgeıin arttyrý boıynsha sharalar josparyn qurastyrý tapsyryldy.
Sonymen qatar, 29 naýryzdan bastap, áýe tasymaldaýshy qyzmetiniń jospardan tys ınspektsııalyq tekserisi bastalady.
Jıynda «Bek Eır» AQ Basqarma tóraǵasy Nurlan Jumasultanov jaqyn arada áýe kompanııasy IOSA halyqaralyq avıatsııalyq aýdıtten ótýge kirisetinin aıtty.
2016 jyly 27 naýryzda saǵat 10:36-da Astana áýejaıyna «Bek Eır» kompanııasynyń «Fokker-100» ushaǵy apattyq jaǵdaıda qondy.
«Qyzylorda-Astana» baǵytynda ushqan ushaq bortynda 121 adam, onyń 116-sy jolaýshy jáne 5 ekıpaj múshesi boldy. Japa shekkender joq.
