Astana áýejaıynda 2 mln dollardyń kontrabandalyq zergerlik buıymdary anyqtaldy
ASTANA. QazAqparat - Astana áýejaıynda quny 2 mıllıon dollar bolatyn zergerlik buıymdar kontrabandasynyń joly kesildi, dep habarlady «QazAqparat» HAA QR UQK Shekara qyzmetine silteme jasap.
«Shuǵyl aqparat boıynsha «Nursultan Nazarbaev» halyqaralyq áýejaıynda Ystanbul-Astana qatynasy halyqaralyq reısine qatysty tekserý júrgizý kezinde Shekara qyzmetiniń áskerı qyzmetshileri QR UQK qyzmetkerlerimen birge, 1980 jyly týǵan Ázerbaıjan azamatynyń atyna jiberilgen júk bırkalary bar, salmaǵy 48 keli bolatyn eki sómkeni Qazaqstan Respýblıkasy aýmaǵyna ákelý áreketiniń jolyn kesti», - dep habarlady vedomstvonyń baspasóz qyzmetinen.
Tekserý barysynda sary jáne sur tústi qymbat metaldan (32 keli sary tústi metall, 16 keli sur tústi metall) jasalǵan 11 786 zergerlik buıym tárkilendi.
Kontrabandanyń boljamdy quny 2 mln. AQSh dollaryna baǵalanýda.
Qylmystyq is qozǵalyp, tergeý sharalary júrip jatyr.
