Astana áýejaıyna jaqyn mańda qamys órtenip jatyr
ASTANA. QazAqparat - Órt sóndirýshiler Astana shetindegi Maıbalyq kóliniń boıyndaǵy órtti sóndirip jatyr, dep habarlaıdy QazAqparat tilshisi QR ІІM Tótenshe jaǵdaılar komıtetiniń baspasóz qyzmetine silteme jasap.
«Búgin saǵat 13:37 shamasynda Astana qalasy Esil aýdanyndaǵy «Nursultan Nazarbaev» Halyqaralyq áýejaıynyń artynda, Maıbalyq kóliniń boıynda qamys órtendi. Órttiń aýmaǵy 3 myń sharshy metrdi qurady», - delingen baspasóz habarlamasynda.
Tilsiz jaý shamamen saǵat 16:10-da aýyzdyqtalǵan. Alaıda órt sóndirý jumystary áli de jalǵasýda.
«Oqıǵa ornynda tótenshe jaǵdaılar qyzmetinen 15 adam men 4 arnaıy tehnıka jumys jasap jatyr. Sonymen qatar, órt sóndirýde 1 arnaıy tehnıka, qaıyq, 4 adam, «Zelenstroı» JShS-niń bir tehnıkasy, «Astana Ormany» uıymynyń 6 tehnıkasy (3 PM, 2 traktor, 1 ÝAZ) tartyldy», - dep habarlady TJK-dan.
