Astana áýejaıyna Elbasynyń esimin berý óte durys sheshim - Qasym-Jomart Toqaev
ASTANA. QazAqparat -QR Parlamenti Senatynyń Tóraǵasy Qasym-Jomart Toqaev Tvıtterdegi paraqshasynda Astana áýejaıyn Elbasynyń esimimen ataýǵa qatysty pikir qaldyrdy, dep habarlaıdy QazAqparat.
«Astana áýejaıy bizdiń memleketimizdiń negizin qalaýshy Elbasy Nursultan Nazarbaevtyń qurmetine ataldy. Óte durys sheshim», - dep jazady Senat spıkeri paraqshasynda.
Eske sala keteıik, búgin Úkimettiń Qazaqstan Respýblıkasynyń aýmaǵyndaǵy áýejaılarǵa, porttarǵa, temirjol vokzaldaryna, temirjol stansalaryna, metropolıten stansalaryna, avtovokzaldarǵa, avtostansalarǵa, jáne memleket menshigindegi basqa da obektilerge ataý berý týraly qaýlysyna ózgerister engizilgen bolatyn. Onda asa kórnekti memleket jáne qoǵam qaıratkerleriniń, ǵylym, mádenıet qaıratkerleriniń jáne Qazaqstan Respýblıkasy men álemdik qoǵamdastyq aldynda eńbek sińirgen basqa da adamdardyń esimderin berý máselesi qarastyrylady. «Egemen Qazaqstan» jáne «Kazahstanskaıa pravda» gazetterinde jarııalanǵan qaýlyǵa sáıkes, Astana halyqaralyq áýejaıy Elbasy Nursultan Nazarbaevtyń esimimen atalatyn boldy.
Toqtala ketetin jaıt, QR Táýelsizdiginiń 25 jyldyǵy deklaratsııasynda Elbasynyń esimin mańyzdy nysandarda kórsetý usynylǵan bolatyn. Deklaratsııada : «El Konstıtýtsııasynda Tuńǵysh Prezıdent - Elbasy Nursultan Ábishuly Nazarbaevtyń bizdiń memleketimizdi qurýdaǵy biregeı úlesin atap ótýdi, Elbasynyń esimin elordanyń ataýynda jáne elimizdiń basqa da mańyzdy nysandarynda kórsetýdi usynamyz. Bizdiń tutas maqsatymyz - Elbasy tóńiregine toptasyp, eń qymbat qazynamyz - táýelsiz Qazaqstandy kózimizdiń qarashyǵyndaı saqtap jáne urpaqtarymyzǵa amanattap, «Máńgilik El» qundylyqtaryn qasterleý», - delingen.
