Astana áýejaıy jóndeý jumystaryna baılanysty jolaýshylarǵa eskertý jasady

ASTANA. QazAqparat - Astana halyqaralyq áýejaıy jolaýshylarǵa T1 termınalynyń aldynan ótetin jol kezeń-kezeńimen jabylatynyn eskertti, dep habarlaıdy QazAqparat.

Eske sala keteıik, byltyr kúzde jańbyr jaýǵanda elordalyq áýejaıdyń jaqynda ǵana jóndelgen termınalynyń shatyrynan sý ótken bolatyn.

Osyǵan baılanysty bıyl merdiger «Mabco Constructions SA» qurylys kompanııasy óz mindettemesin oryndap, Astana halyqaralyq áýejaıynyń ǵımaratynda qurylys-montajdaý jumystaryn júrgizip jatyr.

«Jóndeý jumystaryna baılanysty 1 sáýir men 1 maýsym aralyǵynda T1 termınalynyń aldynan ótetin jol kezeń-kezeńimen jabylatyn bolady. Qolaısyzdyq úshin keshirim suraımyz» dep eskertedi áýe aılaǵynyń ákimshiliginen.