Astana áýejaıy jańa termınalynyń múmkindikteri tanystyryldy
ASTANA. QazAqparat - Astana áýejaıynyń jańa termınaly boljam boıynsha aldaǵy 10 jyl boıy jolaýshylar aǵymyna qolaıly jaǵdaıdy qamtamasyz etedi.
Bul týraly búgin Májiliste memleket qarjysyn maqsatty paıdalanýdy baqylaý boıynsha «Nur Otan» partııasy fraktsııasy janyndaǵy komıssııanyń otyrysynda málim boldy, dep habarlaıdy QazAqparat.
«Astana áýejaıy jańa termınalynyń jalpy aýdany 47 myń sharshy metr. Jolaýshylar ótkizý qabilettiligi jylyna 8,2 mıllıonǵa deıin artady nemese saǵatyna 2,5 myń adam. Tórt qabattan turady. Aldaǵy 10 jylda jolaýshylar tasymaly boıynsha bizdiń áýejaıdyń barlyq qajettilikterin qanaǵattandyrady»,-dedi QR IDM Azamattyq avıatsııa komıteti áýejaılar basqarmasynyń basshysy Amantaı Qoqataev.
Onyń aıtýynsha, jobanyń quny 60 mlrd. teńgege baǵalanyp otyr, onyń ishinde 39 mlrd. teńgesi Ulttyq qor qarjysyna tıesili. Bul qarjynyń barlyǵy tolyq kólemde ıgerilgen kórinedi. Qazirgi ýaqytta termınaldaǵy qurylys jumystary tolyqtaı aıaqtalyp, jabdyqtardy montajdaý jumystary atqarylýda.
«Eski jáne jańa termınaldardyń arasyn qostyq. 2017 jylǵa taǵy da 5 mlrd. teńge qarastyrylǵan. Mamandardyń baǵalaýy boıynsha oryndalǵan jumystardyń kólemi 75 paıyzǵa jetip otyr»,-dedi basqarma basshysy.
