Astana áýejaıy jańa termınalynyń qurylysy 2017 jyldyń naýryzynda aıaqtalady - Qasymbek
ASTANA. QazAqparat - Astana áýejaıy jańa termınalynyń qurylysy 2017 jyldyń naýryzynda aıaqtalady. Bul týraly búgin QR Úkimeti otyrysynda elimizdiń Investıtsııalar jáne damý mınıstri Jeńis Qasymbek málim etti, dep habarlaıdy QazAqparat tilshisi.
«2015 jyldyń qańtarynda «Nurly jol» baǵdarlamasyn oryndaý aıasynda «Astana qalasy áýejaıynyń ushý-qoný jolaǵyn qaıta jańǵyrtý men jańa termınaldyń qurylysy» jobalary bastaldy. Joba boıynsha jańa termınaldyń, VIP termınaldyń, jańa turaq oryndary, ınjenerlik ınfraqurylym qurylystary men perrondy qaıta jańǵyrtý jáne sol aýmaqty abattandyrý júzege asyrylady», - dedi mınıstr.
Onyń aıtýynsha, joba quny 60,2 mlrd. teńgeni quraıdy. Bıyl Ulttyq qordan 10 mlrd. teńge shamasynda qarjy bólindi. Ol qarajat tolyq kólemde ıgerildi. Búgingi tańda ǵımarattyń temir betondy jáne bolat qańqasyn turǵyzý jumystary aıaqtaldy. Qasbetin, shatyryn, sý ótkizý jelisin, jylý, elektrmen jabdyqtaý jáne kommýnıkatsııalyq baılanys jelilerin ornatý jumystary atqarylýda. Іshki árleý jumystary júrip jatyr jáne bagajdy óńdeý avtomatty qurylǵy júıesin montajdaý jumystary bastaldy.
«Oryndalǵan jalpy jumys kólemi - 58 paıyz. Qurylystyń tolyǵymen aıaqtalýy 2017 jyldyń naýryz aıyna josparlanyp otyr», - dedi J.Qasymbek.
