Astana áýejaıy: jańa termınaldyń jańalyǵy nede
ASTANA. QazAqparat - Astana áýejaıynyń jańa termınaly zaman talabyna saı ozyq texnologııalarmen jadyqtalǵan. Máselen, kóp júkteri joq jolaýshylar otyrǵyzý talonyn almaı-aq uıaly telefonnyń kómegimen tólqujatty tekserý aımaǵyna óte alady. Sóıtip, tirkeýge ketetin biraz ýaqytty únemdeýge múmkindik bar, dep habarlaıdy QazAqparat tilshisi.
Jańa termınalda 26 birdeı tirkeý baǵanasy bar. Ádette jolaýshylar sol jerden otyrǵyzý talondaryn alyp, júkterin tapsyryp jatady. Ondaıda uzyn-sonar kezekter bolady. Oǵan qosa, tirkeýden ótý úshin, kem degende, bir saǵat buryn kelý kerek. Alaıda áýejaıdyń jańa ǵımaratynda ornalasqan avtomatty termınaldar arqyly otyrǵyzý talondaryn qolma-qol alýǵa bolady. Ondaı qyzmet júkteri az jolaýshylar úshin asa tıimdi. Tólqujat pen bılet nómirin engizgennen keıin tirkeýdiń kezegine turmaı-aq ary qaraı óte beredi. Buryn qyzmettiń bul túrin tek «Eır Astananyń» jolaýshylary ǵana qoldana alatyn. Endi, ony kez kelgen áýe kompanııasynyń klıentteri paıdalana alady
«Jańa texnologııanyń taǵy bir túri ol - shtrıx-kod arqyly tirkeýden ótý qyzmeti. Ondaıda talon alýdyń qajeti joq. Adam jańaǵy termınaldardyń kómegine júginbese de bolady. Jolaýshy asyǵyp tursa, ınternet arqyly bıletti satyp alyp, tirkeýden ótse, áýe kompanııasy oǵan otyrǵyzý talonyn jiberedi. Talonda shtrıx-kod bar. Mine, dál sol shtrıx-kodpen jolaýshy esh kedergisiz baqylaýdyń kelesi kezeńine óte alady», - dedi Astana Halyqaralyq áýejaıynyń baspasóz xatshysy Kámıla Qasymbekova QazAqparat tilshisine bergen suxbatynda.
Aıta keteıik, búgin Memleket basshysy Nursultan Nazarbaev Astana áýejaıynyń jańa termınalyn ashty. Termınaldyń júk ótkizý júıesi de zaman talabyna saı. «Atalǵan júıeniń basty ereksheligi sol, qandaı da bir qaýipti júkter bolsa, onyń barlyǵy avtomatty túrde birden basqa jolaqpen ketedi de, qaýipsiz aımaqqa shyǵarylady», - deıdi áýejaıdyń bas dırektory Radilbek Ádımolda.
