Astana áýejaıy ushaq bortyndaǵy taǵamdardy ázirleýdiń sapasyn arttyrmaq
ASTANA. QazAqparat - Elorda áýejaıyndaǵy jolaýshylardy tamaqtandyrý sapasy arta túspek. Óıtkeni, jaýapty kompanııa osy salany álemdik dárejedegi mamandarǵa tapsyrmaq. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda «Airoport Management Group» JShS Bas dırektorynyń orynbasary Asqar Muratbaev málimdedi.
«Bıyl negizgi basymdyq qyzmet kórsetýdiń halyqaralyq standarttaryna ótýge baǵyttalady. ıAǵnı, qyzmet kórsetý salasy joǵarylaıdy degen sóz. Qazir biz Astana áýejaıyna jolaýshylarǵa jerde de, áýede de sapaly qyzmet kórsete alatyn halyqaralyq kóshbasshy kompanııalarmen kelissózder júrgizip jatyrmyz», - dedi A.Muratbaev.
Onyń aıtýynsha, osy rette ushaq bortyndaǵy tamaqtandyrýǵa da kóńil bólinbek.
«Biz bortta tamaqtandyrý salasyndaǵy álemdik kóshbasshy kompanııalardyń birin Astana áýejaıynda qyzmet kórsetýge shaqyrdyq. Bıyl áýejaı mańynda bort taǵamdaryn ázirleıtin tseh iske qosylady. Al áýejaı ishindegi qyzmet kórsetýge keler bolsaq, bul rette de biraz ózgerister bolady. Naqtyraq aıtsaq, qyzmet kórsetý salasy kommertsııalandyrylyp, kez kelgen ekonomıkalyq qyzmettiń qatysýshylaryna, ásirese jolaýshylarǵa qyzmet kórsetetinderge áýejaıdyń qoıatyn talaptary kúsheıtiledi. Bul talaptardyń barlyǵy jolaýshylardy kóńilin tabýǵa arnalatyn bolady», - dep túıdi ol.
Aıta keteıik, AMG kompanııasy Qazaqstan áýejaılaryn ońtaılandyrý maqsatynda jáne ǵalamdyq ındýstrııalandyrýǵa qatysý úshin áýe aktıvterin basqarý maqsatynda qyzmet etedi. Búginde Qazaqstannyń 6 áýejaıynyń aktsııalar paketi osy kompanııaǵa basqarýǵa berilgen. Basqarýshy kompanııa óz «shańyraǵyna» barlyǵy 11 áýejaıdy biriktirýdi josparlap otyr.
