Astana áýejaıy reısterdiń kúzgi-qysqy kestesine ótti
ASTANA. QazAqparat - Astana áýejaıy men «Eır Astana» kompanııasy reısterdiń kúzgi-qysqy kestesine ótti. Atalǵan maýsymdyq keste 2016 jyldyń 26 naýryzyna deıin sozylady.
Qaýipsizdikti qamtamasyz etý maqsatynda aerodromnyń jasandy joldary jóndeldi, jazda boıalǵan belgiler jańartyldy. Sonymen qatar, ushý-qoný alańyndaǵy jaryqtar aýystyryldy.
Qysqy maýsymnyń bastalýyna oraı, qysta ushaqtardy muzdan qorǵaý maqsatynda ushaqtardyń syrtyn maılaıtyn 7 arnaıy kólik shyǵaryldy. Aerodromdy jáne ushaqtardy qalypty jaǵdaıda ustaý úshin arnalǵan barlyq tehnıkalardyń daıyndyǵy pysyqtaldy.
«Qysqy ýaqyttarda jolaýshylar áýejaıǵa erterek kelýleri tıis. Ushaq usharǵa 15 mınýt qalǵanda barlyq jolaýshylar termınalda bolýlary kerek. Sebebi, ushaqtardy qysta daıyndaý úshin birshama ýaqyt qajet. Ushaqtardyń syrtyn muz qatpaý úshin arnaıy maımen óńdeıdi, sondaı-aq ushý barysyndaǵy qaýipsizdikti qamtamasyz etý úshin qajetti jumystar atqarylýy qajet», - deıdi «Eır Astana» AQ áýekompanııasynyń ókili Gúlnár Sátbaeva.
Qazirgi ýaqytta Astana áýejaıynda 19 áýekompanııa 38 baǵyt boıynsha ushyrylym jasaıdy. Aıta ketý kerek, 2015 jyldyń 10 aıy ishinde Astana áýejaıynan 20 166 reıs ushty. Onyń ishinde 1473 reıs keshiktirilgen. Qysqy maýsymda ushaqtardyń keshiktirilýi aýa raıynyń qolaısyzdyǵynan kóbeıýi yqtımal.
