Astana áýejaıy mańyndaǵy alańdy jańǵyrtý bastaldy
ASTANA. QazAqparat - Búgin «Astana» halyqaralyq áýejaıy mańyndaǵy alańdy keńeıtý jáne jolaýshylardyń jaılylyq deńgeıin kóterý jumystary bastaldy, dep habarlaıdy QazAqparat.
Áýejaı baspasóz qyzmetiniń aqparatyna sáıkes, qaıta jóndeý kezinde áýejaı termınaly aldyndaǵy aımaq jolaýshylardy otyrǵyzý jáne túsirý kezinde ǵana qoljetimdi. Avtomobıldi turaqqa qoıý balama tegin turaqta iske asady. Termınaldyń jabyq qorǵalatyn parkıngi óz jumysyn burynǵydaı jalǵastyrady.
«Astana áýejaıyndaǵy qurylys jumystary vokzal mańyndaǵy alańdy jańǵyrtý satysyna ulasty. Vokzal mańyndaǵy alańynyń jańa jobasyn qurastyrǵanda aldymen bizdiń áýejaıdaǵy jolaýshylardyń yńǵaıyn oıladyq. Qaıta jóndeýden keıin turaqqa qoıý alańy eki esege úlkeıedi. Sondaı-aq saıahattaýshylardyń ýaqytyn únemdeý úshin áýejaıǵa kirý jáne kireberis avtomattarynyń sany ósedi. Barlyq múmkindikti qoldansaq ta, jóndeý jumystaryna baılanysty yńǵaısyzdyqty azaıtsaq ta, ókinishke oraı, vokzal mańy alańyn jabýǵa týra keldi. Biz ýaqytsha qolaısyzdyq úshin keshirim ótinemiz, jolaýshylarymyzǵa túsinistik bildirgeni úshin alǵys bildiremiz!», - dedi «Astana halyqaralyq áýejaıy» AQ basqarma tóraǵasy Paolo Rıchıottı.
Vokzal mańy alańyn qaıta jóndeý avtoturaqqa 350 mashınanyń ornyna 1 000 kólikke deıin qoıýǵa múmkindik beredi. Budan basqa, Astana qalasynyń ákimdigimen birge turaqqa kirý jáne shyǵý keńeıtildi jáne jaqsartyldy. Qoǵamdyq kólikke qosymsha jolaqtar qosyldy, sondaı-aq taksı turaǵy úshin arnaıy aımaq qarastyryldy.
Vokzal mańy alańyn jóndeý jumystarynyń bastalýyna baılanysty jolaýshylarǵa Astana halyqaralyq áýejaıyna erterek kelý usynylady.
