Astana áýejaıy Qazaqstanda jolaýshylarǵa qyzmet kórsetý sany jaǵynan ekinshi orynda tur - Q. Jaýhanov
ASTANA. QazAqparat - Astana áýejaıy Qazaqstanda jolaýshylarǵa qyzmet kórsetý sany jaǵynan ekinshi orynda tur. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Astana halyqaralyq áýejaıy» AQ Basqarma tóraǵasy Qaırat Jaýhanov málim etti.
Basqarma tóraǵasynyń aıtýynsha, Astana halyqaralyq áýejaıynyń jolaýshylar aǵyny jyl saıyn shamamen 11-12 paıyzǵa artyp keledi. Máselen, eger 2010 jyly jolaýshylar aǵyny 1 mln. 600 myń adamǵa deıin jetse, 2014 jyly bul júkteme 3 mln.-dyq mejeni eńsergen. Osy rette Qaırat Jaýhanov jolaýshylar kóleminiń artýyna eń birinshi kezekte avıakompanııalardyń jańa baǵyttardy ashýy sebep bolǵanyn aıtady. Ushý baǵyttarynyń jıiligi de bul kórsetkishke oń serpin berip otyr. Tóraǵanyń sózine qaraǵanda, qazirgi kúni Astana áýejaıynda jolaýshylardy qabyldaý jaılylyǵy baǵytynda jumystar atqarylýda. Máselen, termınalda jolaýshylardy kútý aımaǵy keńeıtilgen, kezekterdiń ótý tártibin ońaılatý úshin arnaıy lentalar ornatylǵan.
«Búgingi tańda Astana halyqaralyq áýejaıy Qazaqstanda jolaýshylarǵa qyzmet kórsetý sany boıynsha ekinshi oryn alady. Áýejaı 16 avıakompanııaǵa qyzmet kórsetedi. Atalmysh kompanııalar ishki 15 jáne 19 halyqaralyq baǵyt boıynsha reısterdi oryndap jatyr», - deıdi Qaırat Jaýhanov.
