Astana áýejaıy qaýipti vırýstyq juqpalar ákelingen jaǵdaıda shuǵyl is-sharalarǵa daıyn
ASTANA. 31 qańtar. QazAqparat - Keshe Astana Halyqaralyq áýejaıynda Qazaqstan Respýblıkasy Densaýlyq saqtaý mınıstrligi Memlekettik sanıtarlyq epıdemıologııalyq qadaǵalaý komıtetiniń (DSM MSEQK) Kóliktegi departamenti
Pandemııalyq tumaýdyń aldyn alý, epıdemııaǵa qarsy shuǵyl shara qoldaný jóninde oqý-jattyǵý jumystaryn ótkizdi.
Elordanyń resmı saıtynda habarlanǵandaı, atalǵan sharaǵa Astana qalasy densaýlyq saqtaý basqarmasy, MSEQK departamenti, Astana qalasy Sanıtarlyq-epıdemıologııalyq saraptama ortalyǵy, shekara qyzmetkerleri jáne áýejaı qyzmetkerleri qatysty.
«Búginde dúnıejúzinde norovırýstyq ınfektsııa taralý ústinde. Ulybrıtanııada mıllıonǵa jýyq adam osy aýrýdy juqtyrsa, Japonııada kóz jumǵandar da bar. Al áýe kóliginde mundaı juqpaly aýrý túrin juqtyrǵan jolaýshy tirkelse, onda ol adamdy ońasha otyrǵyzyp, betperde kıgizý kerek», - deıdi MSEQK Kóliktegi departamenti sanıtarlyq-karantındik pýnktiniń bastyǵy Darııa Ázimbaeva.
Oqý-jattyǵý jospary boıynsha: áýe kemesiniń komandıri bortta qyzýy kóterilip, qaltyrap, bas aýrýyna shaǵymdanǵan jolaýshynyń baryn jetkizedi. Eleń etkizgen bul aqparat áýejaı qyzmetkerlerin, qalalyq medıtsınalyq mekeme qyzmetkerlerin aýrýdyń tarap ketpeýiniń aldyn alýǵa jumyldyrady. Al, reıstegi qalǵan jolaýshylardyń naýqaspen qarym-qatynasta bolmaǵany jáne olardyń dene qyzýlary tekseriledi. Al ushaq ishi tolyǵymen zalalsyzdandyrylady.
Halyqaralyq Astana áýejaıynda apta saıyn halyqaralyq reıspen 7800-ge jýyq jolaýshy tasymaldanady. Onyń 2 myńy juqpaly aýrýlar keń taraǵan aımaq sanalatyn Shyǵys Azııa elderinen keledi. Al mundaı oqý-jattyǵý jumystary jyl saıyn ótkizilip keledi. Búgingi ótken tájirıbelik jumys medıtsına mekemeleriniń aýrýdyń aldyn alýǵa daıyndyǵyn taǵy bir dáleldedi.
