Astana áýejaıynyń jyldar boıy jabylmaǵan shyǵyny 36 mlrd teńge boldy

Áýejaıdyń málimetinshe, qarjylyq jaǵdaıdy jaqsartý úshin kásiporynda daǵdarysqa qarsy baǵdarlama iske asyrylyp jatyr. Onyń aıasynda tarıfterdiń ekonomıkalyq negizi qaıta baǵalanyp, operatsııalyq shyǵyndardy azaıtý jáne ishki rezervterdi paıdalaný kózdelgen.

2026 jyldyń alǵashqy jeti aıynda áýejaıdyń negizgi óndiristik kórsetkishteri ósken. Qańtar-shilde aralyǵynda áýejaı 5,4 mln jolaýshyǵa qyzmet kórsetken. Bul byltyrǵy osy kezeńdegi 5,3 mln jolaýshymen salystyrǵanda 1,3% kóp.

— Іshki reıster sany 24 myńnan 25 myńnan astamǵa, halyqaralyq reıster 12 myńnan 12,4 myńǵa deıin artqan. Al júk pen poshta óńdeý kólemi 7,4 myń tonnadan 8,9 myń tonnaǵa deıin ósip, 20%-dan astam kóbeıgen. Áýejaıdyń avıatsııalyq emes qyzmetterden túsetin kirisi de artqan. 2026 jyldyń qańtar-maýsym aılarynda bul kórsetkish 7,2 mlrd teńge boldy. Bir jyl buryn ol 5,8 mlrd teńge bolǵan. Ósim — 24%, — dep habarlady áýejaıdyń baspasóz qyzmeti.

Alaıda osy jyldyń alǵashqy jartysynda áýejaı jumysyna birqatar faktor kesirin tıgizgen. Atap aıtqanda, kúndiz ushý-qoný jolaǵyn shekteı otyryp júrgizilgen jóndeý jumystary, avıatsııalyq kerosın baǵasynyń ósýi jáne Taıaý Shyǵystaǵy jaǵdaıǵa baılanysty halyqaralyq reısterdiń toqtatylýy saldarynan shamamen 1,1 myń reıs oryndalmaǵan.

Áýejaı basshylyǵy men Astana ákimdigi jyl sońyna deıin qarjylyq jáne operatsııalyq kórsetkishterdi jaqsartý jumystaryn jalǵastyratynyn málimdedi. Negizgi baǵyttar qatarynda tarıf saıasatyn jetildirý, qyzmetterdiń tabystylyǵyn arttyrý, operatsııalyq protsesterdi ońtaılandyrý jáne shyǵyndardy azaıtý bar.

Eske salaıyq, buǵan deıin Astana áýejaıynyń múmkindigi qanshalyqty artqany týraly jazǵanbyz.