Astana áýejaıynyń ótkizý qabileti 4 ese artady – Premer-mınıstr

ASTANA. KAZINFORM – Avıaotynnyń baǵasy 1200 dollardan shamamen 950 dollarǵa deıin tómendetildi. Bul týraly Úkimettiń keńeıtilgen otyrysynda Premer-mınıstr Oljas Bektenov málim etti.

- Bıyl 11 myń shaqyrymda avtomobıl joldaryn salý men rekonstrýktsııalaý jumystary iske asyrylatyn bolady. Sizdiń tapsyrmańyzǵa sáıkes avıaotyn naryǵyndaǵy deldaldardyń jumysyn toqtattyq. Nátıjesinde avıaotynnyń baǵasy 1200 dollardan shamamen 950 dollarǵa deıin tómendetildi. Bul bizdiń áýe keńistiginiń sheteldik avıakompanııalar úshin tartymdylyǵyn kúsheıtýde. Bıyl Astana qalasynyń áýejaıynda ekinshi ushý-qoný jolaǵynyń qurylysyn bastaımyz. Ony iske qosý 20 jyl boıy jóndeý kórmegen birinshi jolaqty jańǵyrtý jumystaryna kirisýge múmkindik beredi, - dedi O. Bektenov.

Onyń aıtýynsha, bul Astana áýejaıynyń ótkizý qabiletin 4 ese arttyryp, 40 mln jolaýshyǵa deıin jetkizedi. Shilde aıynda Almaty áýejaıynyń ishki termınalyn kúrdeli jóndeý jumystary aıaqtalady. Ótkizý qabileti 14 mln jolaýshydan 19 mln-ǵa deıin artady. Ushý-qoný jolaǵyn jańǵyrtý boıynsha qurylys-montaj jumystary bastalady.

Osyǵan deıin shsh jylda geologııalyq barlaý jumystaryna shamamen 500 mln dollar ınvestıtsııa salynatyny týraly jazdyq.