Astana áýejaıynyń qyzmetkeri jumys ornynda qaıtys boldy
Nursultan Nazarbaev halyqaralyq áýejaıynda joljúk pen júk tasymaldaıtyn júrgizýshi qaıtys boldy, dep habarlaıdy Kazinform.
«2023 jyldyń 2 qarashasynda Nursultan Nazarbaev halyqaralyq áýejaıynda óziniń jumys ornynda – joljúk pen júk kóliktik tıeý kabınasynda es-tússiz jatqan júrgizýshi tabylyp, medıtsınalyq qyzmet shaqyrylǵan. Dárigerler júrgizýshiniń bıologııalyq ólimin tirkedi», - dep habarlady Astana halyqaralyq áýejaıynyń resmı ókili, PR qyzmetiniń basshysy Toıgúl Jubanysova.
QR ІІM TJD tergeý-jedel toby jedel-izdestirý sharalaryn júrgizgen. Júrgizýshiniń máıiti áýejaıdyń feldsherlik-akýsherlik pýnktinen jedel járdem kóligimen Astana qalasynyń sot-medıtsınalyq saraptama ortalyǵyna jiberildi.
«Júrgizýshi 2023 jyldyń qazan aıynda medıtsınalyq tekserýden ótken. Tańerteń aýysym aldyndaǵy mindetti medıtsınalyq tekserýden de ótken, densaýlyǵyna shaǵym bolmaǵan. Astana halyqaralyq áýejaıynyń ákimshiligi qaıtys bolǵan qyzmetkerdiń otbasy men jaqyndaryna qaıǵyryp kóńil aıtady. Sondaı-aq Astana halyqaralyq áýejaıy marqumnyń otbasyna barlyq tıisti áleýmettik kómekti kórsetedi», - deıdi resmı ókil.
