Astana áýejaıynda ushý-qoný jolaǵynyń jóndeý jumystary aıaqtaldy

ASTANA. KAZINFORM – Astana halyqaralyq áýejaıynda ushý-qoný jolaǵynyń josparly jóndeý kezeńi tolyq aıaqtaldy.

Áýejaıdyń baspasóz qyzmeti taratqan aqparatqa sáıkes, jóndeý jumystary belgilengen merzimde aıaqtalyp, aerodrom ınfraqurylymynyń senimdiligin arttyrý men ushý qaýipsizdigin qamtamasyz etýge baǵyttalǵan.

Jóndeý kezeńinde saǵat 10:00-den 18:00-ge deıin reısterdi qabyldaýǵa ýaqytsha shekteý qoıylǵan. Soǵan qaramastan, áýejaı barlyq josparlanǵan ushýlardy oryndap, kesteni beıimdep, keshki jáne túngi reıster sanyn arttyrǵan.

Vedomstvonyń málimetinshe, jóndeý kezeńinde óndiristik kórsetkishter turaqty deńgeıde saqtalǵan.

– Jóndeý jumystaryna baılanysty reısterdiń kúshin joıý jaǵdaıy bolǵan joq. Barlyq ushýlar áýe kompanııalar jáne aeronavıgatsııa qyzmetterimen birlesip tolyq oryndaldy. 1 qarashadan bastap Astana áýejaıy shtattyq rejımde jumysyn jalǵastyrady, – delingen habarlamada.

Aıta keteıik, Qazaqstan áýejaılarynda shekaralyq baqylaýdan ótý tártibi bekitildi.