Astana áýejaıynda ushaqtardyń túnde ushyp-qonýyna shekteý qoıylady
ASTANA. KAZINFORM – Bıyl 1 mamyrdan bastap elorda áýejaıynyń ushý-qoný jolaǵyna kúrdeli jóndeý júrgizýge baılanysty shekteýler engiziledi. Bul týraly áýejaıdyń qyzmeti habarlady.
Astana qalasynyń áýejaıyn tolyq jańǵyrtýǵa baılanysty daıyndyq jalǵasýda. Onyń sheńberinde Kólik mınıstrligi elorda áýejaıy basshylyǵymen birlesip, otandyq jáne sheteldik áýe kompanııalardyń ókilderimen keńes ótkizdi.
«Birqatar kelissózderdiń, aýa raıy boljamynyń, áýejaıdyń ártúrli ýaqyt aralyǵyndaǵy júktemesin zerdeleı kele, jolaýshylar úshin týyndaıtyn qolaısyzdyq saldaryn azaıtý maqsatynda túngi ýaqytta kúrdeli jóndeý júrgizý týraly sheshim qabyldandy. Osylaısha, 2024 jylǵy 1 mamyrdan 24 jeltoqsanǵa deıin jergilikti ýaqyt boıynsha saǵat 22:00-den 06:00-ge deıin Astana qalasynyń áýeaılaǵynda áýe kemeleriniń ushyp-qonýyna shekteý qoıylady. Bul shara áýejaı usynatyn qyzmetterdiń sapasyna keri áser etpeıdi», - dep jazylǵan resmı habarlamada.(
Óz kezeginde ushý-qoný jolaǵyn kúrdeli jóndeý jumystary barlyq qajetti qurylys normalary men qaýipsizdik normalaryn saqtap, Kólik mınıstrliginiń Azamattyq avıatsııa komıteti men Qazaqstannyń avıatsııalyq ákimshiliginiń turaqty baqylaýymen júrgizilmek.
Áýejaıdyń qazirgi ushý-qoný jolaǵy 20 jyldan astam ýaqyt buryn paıdalanýǵa berilgen jáne senimgerlik basqarý kezeńinde ınvestorǵa artylǵan basty mindet – ushý-qoný jolaǵyn kúrdeli jóndeý bolǵan.
«Osy iri jobany iske asyrý ınvestordyń jeke qarajaty esebinen júzege asyrylady. Birinshi kezekte áýe kemeleriniń barlyq túrlerin shekteýsiz qabyldaý úshin ushý qaýipsizdigin qamtamasyz etýge jáne áýeaılaq jabyndarynyń sapalyq sıpattamalaryn jaqsartýǵa baǵyttalǵan. Osy oraıda reıster kestesine ózgerister enýi múmkin. Sondyqtan jolaýshylarǵa áýe kompanııalary men áýejaıdyń anyqtamalyq qyzmetterinen reıs statýsyn naqtylaý usynylady», - deıdi áýejaıdyń baspasóz qyzmeti.
Buǵan deıin Arab kompanııasy Astana áýejaıynyń jumysyn qolǵa alǵany habarlanǵan edi.
