Elorda áýejaıynda sheteldik qonaqtarǵa Qazaqstannyń týy men shokolad taratyldy
ASTANA. KAZINFORM — Respýblıka kúni qarsańynda «Astana jastary» jastar resýrstyq ortalyǵynyń eriktileri elordanyń halyqaralyq áýejaıynda merekelik aktsııa ótkizdi, dep habarlaıdy elorda ákimdiginiń resmı saıty.
Astanaǵa kelgen sheteldik qonaqtarǵa eriktiler Qazaqstannyń týy men shokolad taratty.
Aktsııanyń maqsaty — qonaqqa Qazaqstandy tanystyryp, ulttyq mereke qarsańynda olarǵa merekelik kóńil kúı syılaý.
— Respýblıka kúni — táýelsizdigimizdiń, birligimizdiń jáne Otanǵa degen maqtanyshymyzdyń sımvoly. Bul merekeniń qýanyshyn Qazaqstanǵa kelgen qonaqtarmen bólisý biz úshin erekshe baqyt, — dedi «Astana jastary» jastar resýrstyq ortalyǵynyń eriktisi Madına.
Aktsııaǵa qatysqandardyń biri — Iordanııadan kelgen Wrestling for Peace uıymynyń prezıdenti Den Rassel. Ol Astanaǵa kúresten álem chempıonatyna qatysý úshin kelgen. Sondaı-aq Qazaqstanda buǵan deıin Dúnıejúzilik kóshpendiler oıyndary kezinde de kelgenin aıtty.
— Bul — erekshe mádenıeti men qonaqjaı halqy bar keremet meken. Munda ómir men sportty shyn júregimen jaqsy kóretin adamdar turady, — dep áserimen bólisti Rassel.
Ol buǵan deıingi saparynda kúrestiń ártúrli túrlerin tamashalaý erekshe áser qaldyrǵanyn aıtty. Sol sııaqty álemniń úzdik balýandary chempıondyq ataq úshin baq synaıtyn Astanaǵa qaıta oralǵanyna qýanyshty ekenin jetkizdi.
Sóz sońynda Rassel qazaqstandyqtardy Respýblıka kúnimen quttyqtap, elimizge baqyt tiledi.
Buǵan deıin Astananyń alty aýdanynda Respýblıka kúnine arnalǵan kontsertter ótip jatqanyn jazǵanbyz.
