Astana áýejaıynda bıyl ushaqtar qustarmen 5 ret soqtyǵysqan
ASTANA. KAZINFORM — Astana halyqaralyq áýejaıynda bıyl áýe kemeleriniń qustarmen soqtyǵysý jaǵdaıy eki eseden astam azaıǵan. Byltyrǵy osy kezeńde 11 jaǵdaı tirkelse, bıyl 5 oqıǵa bolǵan.
Áýejaı mamandarynyń aıtýynsha, qustar kóbine tańǵy 03:00–11:00 jáne 15:00–23:00 aralyǵynda belsendi bolady. Osy ýaqytta ornıtologtar aerodrom men onyń mańyn baqylap, qustardyń qozǵalys baǵytyn qadaǵalaıdy.
— Aerodrom mańynda shaǵala, qarǵa, kógershin, saýysqan jáne kúıkentaı jıi kezdesedi. Ásirese, kúz mezgilinde shaǵalalarǵa erekshe nazar aýdarylady. Olar kól men qatty turmystyq qaldyqtar polıgony arasynda top-tobymen ushady. Keıbir baǵyttary ushaqtar júretin aımaqtarǵa jaqyn bolǵandyqtan, mamandar olardyń kúndelikti qozǵalysyn turaqty baqylaýda ustaıdy, — delingen habarlamada.
Qustardy aerodromnan alystatý úshin mamandar bıoakýstıkalyq qondyrǵylar, mehanıkalyq úrkitkishter, shý shyǵaratyn tapanshalar, lazerlik jáne optıkalyq qurylǵylardy qoldanady. Arnaıy avtokólik te mobıldi bıoakýstıkalyq qondyrǵymen jabdyqtalǵan.
Ornıtologtar tek qustardy úrkitip qana qoımaı, olardyń qaıdan keletinin, qaıda ushatynyn jáne qozǵalys baǵytynyń maýsym men táýlik ýaqytyna qaraı qalaı ózgeretinin zertteıdi. Bul málimetter yqtımal qaýipti aldyn ala anyqtap, qajetti sharalardy der kezinde qabyldaýǵa múmkindik beredi.
Mamandar úshin sáýirden qazanǵa deıingi kezeń eń qaýyrt ýaqyt sanalady. Osy aralyqta qustardyń belsendiligi artyp, aerodrom mańynda jıi baıqalady.
Eske salaıyq, buǵan deıin 2026 jylǵy 24 qańtarda FlyArystan áýekompanııasynyń Almaty – Oral baǵyty boıynsha FS7167 reısi ushaq qustarmen soqtyǵysqanyn habarlaǵan edik.
