Astana áýejaıynda avtoturaq tarıfi ósedi
ASTANA. KAZINFORM — Astana halyqaralyq áýejaıynda 2026 jylǵy 1 tamyzdan bastap qysqa merzimdi avtoturaq tarıfi saǵatyna 300 teńgege deıin ósedi. Sonymen qatar, áýejaı uzaq merzimdi turaqqa arnalǵan jańa avtoturaq aımaqtaryn iske qosyp, jolaýshylar úshin tegin jáne qoljetimdi parkıng nusqalaryn saqtap qalmaq. Bul týraly Nursultan Nazarbaev áýejaıynyń baspasóz qyzmeti málim etti.
Astana halyqaralyq áýejaıy avtoturaq ınfraqurylymyn kezeń-kezeńimen damytý jumystaryn jalǵastyrýda. Qazirgi ýaqytta avtokólikterdi uzaq merzimge qoıýǵa arnalǵan qosymsha avtoturaq aımaqtaryn daıyndaý jumystary júrgizilýde. Bul aımaqtarda turaq quny saǵatyna 100 teńgeni quraıdy. Osylaısha jolaýshylar men shyǵaryp salýshylar ózderine tıimdi ári únemdi turaq nusqasyn tańdaı alady. Sonymen qatar, áýejaı kelýshilerine arnalǵan 100 avtokólikke eseptelgen tegin avtoturaq burynǵydaı jumysyn jalǵastyrady.
— Bıylǵy jyldyń 1 tamyzdan bastap Astana halyqaralyq áýejaıynda qysqa merzimdi avtoturaq tarıfteri ózgeredi. Jańa tarıf boıynsha turaq aqysy saǵatyna 300 teńgeni quraıdy. Bul qoldanystaǵy tarıften 100 teńgege joǵary. Aıta ketý kerek, saǵatyna 200 teńge kólemindegi tarıf 2023 jyldan beri ózgerissiz saqtalyp keldi. Osy ýaqyt ishinde paıdalaný shyǵyndary artyp, avtoturaqtardy kútip-ustaý men jańǵyrtýǵa jumsalatyn shyǵyn kólemi aıtarlyqtaı ósti, — delingen habarlamada.
Sonymen birge, azamattardyń jekelegen sanattary úshin qoldanystaǵy jeńildikter saqtalady. I jáne II toptaǵy múgedektigi bar adamdar, basqa memleketterdiń aýmaǵyndaǵy jaýyngerlik is-qımyldardyń ardagerleri, sondaı-aq Semeı ıadrolyq synaq polıgonyndaǵy synaqtardyń zardaptaryn joıýǵa qatysýshy mártebesi bar azamattar avtoturaq aqysyn tóleýden bosatylady.
Avtoturaq ınfraqurylymyn damytý jolaýshylarǵa qolaıly jaǵdaı jasaýǵa, áýejaıdyń termınal aldyndaǵy aýmaǵyndaǵy kólik qozǵalysyn ońtaılandyrýǵa jáne kelýshilerge óz qajettiligine saı eń qolaıly ári tıimdi avtoturaq nusqasyn tańdaýǵa múmkindik beredi.
Buǵan deıin Astananyń keıbir bóliginde aqyly turaqtardyń tólemi ózgerýi múmkin ekenin jazdyq.
