Astana áýejaıynda avtoturaq baǵasyn kóterýge tyıym salyndy
ASTANA. KAZINFORM – Astana qalasy Básekelestikti qorǵaý jáne damytý agenttigi departamentiniń eskertýinen keıin elorda áýejaıy aqyly turaq aımaqtarynda baǵany kóterýden bas tartty.
«Astana qalasy boıynsha Básekelestikti qorǵaý jáne damytý agenttigi departamenti «Nursultan Nazarbaev halyqaralyq áýejaıy» AQ-na básekelestikti qorǵaý salasyndaǵy QR zańnamasyn buzýǵa jol bermeý týraly eskertý jasady», - dep habarlady vedomstvo.
Buǵan deıin áýejaıdyń resmı Instagram paraqshasynda aqyly turaq aımaqtarynda tarıfterdiń kóteriletini týraly aqparat jarııalanǵan bolatyn.
Aqparat quraldarynda da Astana áýejaıynda avtoturaq qymbattaıtyny jarııalanǵan edi.
Básekelestikti qorǵaý jáne damytý agenttiginiń málimetinshe, eskertýden keıin Nursultan Nazarbaev halyqaralyq áýejaıy aqyly turaq aımaqtarynda baǵanyń kóterilýine jol bermeý sharalaryn qabyldady.
