Astana áýejaıy jyl basynan beri 3,3 mln-nan asa jolaýshyǵa qyzmet kórsetti
ASTANA. KAZINFORM — 2026 jyldyń basynan beri Astana halyqaralyq áýejaıy 3 399 272 jolaýshyǵa qyzmet kórsetip, 27 540 reıstiń oryndalýyn qamtamasyz etti.
Áýejaıda jańa áýe baǵyttaryn ashý, halyqaralyq áýe qatynasyn damytý jáne otandyq ári sheteldik áýe tasymaldaýshylarmen yntymaqtastyqty keńeıtý esebinen jolaýshylar aǵyny men reıster sany aldaǵy ýaqytta da artady dep kútiledi.
2026 jyly Astana halyqaralyq áýejaıynyń marshrýttyq jelisi jańa halyqaralyq baǵyttarmen tolyqty. Larnaka (Kıpr), Ulan-Batyr (Mońǵolııa), Gýanchjoý (Qytaı), Erevan (Armenııa) jáne Dalaman (Túrkııa) baǵyttarynyń ashylýy nátıjesinde halyqaralyq baǵyttar sany 42-den 47-ge deıin ósti. Sonymen qatar jolaýshylarǵa Qazaqstan boıynsha 18 ishki baǵyt qoljetimdi. 2026 jyldyń maýsym aıynan bastap Astana — Qyzylorda baǵyty boıynsha reıster jıiligi artty: buryn aptasyna 30 reıs oryndalsa, qazir olardyń sany 33-ke jetti.
— 12 maýsymnan bastap Astana — Shymkent baǵyty boıynsha da reıster jıiligi ulǵaıtyldy. Aptasyna qosymsha 3 reıs engizilip, eki qala arasyndaǵy jalpy reıster sany 60-tan 63-ke deıin artty. Sondaı-aq Astana — Almaty baǵyty boıynsha reıster sany kóbeıdi: endi aptasyna 195 reıs oryndalady, bul burynǵy kestemen salystyrǵanda 5 reıske artyq. Osylaısha, maýsym aıynan bastap Astana halyqaralyq áýejaıynan oryndalatyn ishki turaqty reıster sany 30%-ǵa ósip, aptasyna 752 reısten 984 reıske deıin jetti, — delingen habarlamada.
Jazǵy maýsymda Balqash, Úrjar jáne Úsharal baǵyttary boıynsha áýe qatynasy qaıta jandandy. Bul el ishindegi sapar múmkindikterin keńeıtip, ishki týrızmniń damýyna serpin beredi. Reıster jıiliginiń artýy jolaýshylarǵa saparlaryn ıkemdi josparlaýǵa múmkindik berip, óńirlerdiń kólik qoljetimdiligin arttyrady.
Astana halyqaralyq áýejaıy ushý geografııasyn keńeıtý, ınfraqurylymdy damytý jáne qyzmet kórsetý deńgeıin arttyrý baǵytyndaǵy jumystaryn jalǵastyrady. Jolaýshylarǵa qaýipsiz ári jaıly jaǵdaı jasaýǵa erekshe nazar aýdarylady.
Sonymen qatar qyzmet sapasyn arttyrý, klıenttik servısti jetildirý jáne zamanaýı tsıfrlyq sheshimderdi engizý jumystary júrgizilip jatyr. Mańyzdy baǵyttardyń biri — T2 termınalyn jańǵyrtý. Joba aıasynda termınaldyń ishki keńistikterin jańartý, jolaýshylar ınfraqurylymyn jetildirý, qyzmet kórsetý aımaqtarynyń ótkizý qabiletin arttyrý jáne jolaýshylar aǵynynyń ósýin eskere otyryp, halyqaralyq standarttarǵa saı qolaıly jaǵdaılar jasaý kózdelgen.
Esterińizge sala keteıik, bıylǵy jyldyń mamyr aıynda aerodromda josparly jóndeý-qalpyna keltirý jumystarynyń kezekti kezeńi aıaqtaldy. Júrgizilgen jumystar aıasynda aerodrom jabynynyń jekelegen ýchaskeleri jóndelip, tańbalaý jańartyldy, jaryq-sıgnaldyq jabdyqtar aýystyryldy jáne aerodrom ınfraqurylymynyń qaýipsiz, senimdi ári úzdiksiz jumysyn qamtamasyz etýge baǵyttalǵan birqatar basqa da sharalar júzege asyryldy.
