Astana áýejaıy tamyzda 1,5 myń tonnadan astam júk óńdedi
ASTANA. KAZINFORM – Astana halyqaralyq áýejaıynyń júk termınaly 2026 jylǵy tamyzda 1,5 myń tonnadan astam júk pen poshta jóneltilimin óńdedi.
Tamyzdaǵy turaqty júk aǵynynyń negizgi bóligin kúndelikti tutyný taýarlary, kýrerlik qyzmetterdiń jedel jóneltilimderi, joǵary tehnologııalyq jabdyqtar, qosalqy bólshekter, farmatsevtıkalyq ónimder men poshta jóneltilimderi qurady.
Sonymen qatar áýejaı mamandary arnaıy charterlik reısterdi, temperatýralyq rejımdi qajet etetin júkterdi, tiri janýarlardy jáne elektrondyq kommertsııa taýarlaryn óńdedi.
Atap aıtqanda, júk termınaly jalpy salmaǵy 94 tonna premıým sanattaǵy irimshik ónimderi tıelgen eki arnaıy charterlik reısti qabyldady. Mundaı ónimderdi tasymaldaý kezinde áýe kemesinen túsirgen sátten bastap alýshyǵa tapsyrǵanǵa deıin belgilengen temperatýralyq rejım qatań saqtalýy tıis.
– Júk termınaly úshin kúrdeli operatsııalardyń biri jalpy salmaǵy 95 tonna iri qara mal tıelgen arnaıy reısti óńdeý boldy. Tiri janýarlardy tasymaldaý kezinde termınal mamandary AVI sanatyndaǵy júktermen jumys isteýge qoıylatyn talaptar men halyqaralyq standarttardyń saqtalýyn qamtamasyz etti, – delingen habarlamada.
Áýejaı júk termınaly jumysynyń mańyzdy baǵyttarynyń biri – tranzıttik tasymaldy jáne «avto – avıa» mýltımodaldy logıstıkalyq shemasyn damytý.
Tamyz aıynda termınal elektrondyq kommertsııa taýarlary tıelgen 15 tranzıttik júk kóligine qyzmet kórsetti. Jalpy kólemi shamamen 168 tonna e-commerce júgi avtokólikpen jetkizilip, Astana áýejaıynda óńdelgennen keıin Eýropaǵa áýe kóligimen jóneltýge daıyndaldy.
Turaqty júk tasymaly kóleminiń artýy men tranzıttik baǵyttyń damýy áýejaıdyń jalpy júk aınalymynyń ósýine yqpal etip otyr.
2026 jyldyń qańtar-tamyz aılarynda Astana halyqaralyq áýejaıynda óńdelgen júk pen poshta kólemi 10,4 myń tonnaǵa jetti. Bul 2025 jyldyń sáıkes kezeńimen salystyrǵanda 20%-ǵa joǵary.
Aıta keteıik, Astana áýejaıynyń jyldar boıy jabylmaǵan shyǵyny 36 mlrd teńge boldy.
