Astana áýejaıy sheteldik ınvestordyń basqarýyna beriledi – Úkimet kelisimge qol qoıdy
Premer-Mınıstr Álıhan Smaıylovtyń Túrkistan oblysyna jumys sapary barysynda sheteldik ınvestor – BAÁ-niń Terminals Holding kompanııasymen Astana áýejaıyn mýltımodaldi hab retinde damytý jónindegi yntymaqtastyq týraly kelisimge qol qoıyldy. Kazinform bul týraly primeminister.kz-ke silteme jasap habarlaıdy.
Terminals Holding kompanııalar toby – Azııa men Afrıkanyń iri naryqtarynda tutynýshylarǵa qyzmet kórsetetin, sondaı-aq Abu Dhabi Ports iri portty jáne ónerkásip kompanııasymen baılanysty qarqyndy damyp kele jatqan avıatsııalyq kásiporyn.
Investor elorda áýejaıynyń qyzmetine jan-jaqty baǵa berip, keıinnen jolaýshylarǵa qyzmet kórsetý sapasyn jáne jalpy áýe aılaǵynyń tıimdiligin arttyrý úshin jedel basqarýdy óz qolyna alady.
Investordyń birinshi kezektegi mindeti – ushý-qoný jolaǵyn rekonstrýktsııalaýǵa jáne ony odan ári jańǵyrtýǵa daıyndaý. Daıyndyq jumystaryn jáne elordanyń qysqa merzimdi qurylys maýsymyn eskere otyryp, kelesi jyly jerústi ınfraqurylymyn kúrdeli jóndeýdi bastaý josparlanyp otyr.
Sonymen qatar memleket pen jeke kompanııa múddeleriniń tepe-teńdik balansy nazarǵa alynyp, bolashaq ınvestıtsııalarǵa negiz bolatyn áýejaıdy damytýdyń uzaq merzimdi bıznes-jospary ázirlenetin bolady.
Kólik mınıstrligi Terminal Holding kompanııasymen yntymaqtastyqty nyǵaıtý Memleket basshysynyń Qazaqstan halqyna Joldaýynda elimizdegi áýejaılardy mýltımodaldi ortalyqtar retinde damytý jónindegi belgilengen mindetterdi iske asyrýǵa eleýli úles qosatynyn basa aıtty.
