Astana áýejaıy mańyna jınalǵan sýdyń sebebi ataldy

ASTANA. KAZINFORM — Astana áýejaıy janyndaǵy jol boıynda sý jınaldy. Buǵan ne sebep boldy jáne ınfraqurylymǵa qaýip tóndire me – Kazinform agenttiginiń tilshisi anyqtap kórdi.

– Jol boıynda jınalǵan sý – ádettegi tabıǵı qubylys. Bıyl kóktemgi jaýyn-shashyn qar erimegen jáne jerdiń tońy tolyq jibimegen kezeńde bastaldy. Kún saıyn jaýǵan jańbyr men salqyn aýa raıy saldarynan jol deńgeıinen tómen ornalasqan ýchaskelerde sý jınalyp jatyr. Bul Maıbalyq kólinen sý jiberýmen esh baılanysty emes, – dep habarlady áýejaıdyń baspasóz qyzmeti.

«Qazsýshar» kásipornynyń málimetinshe, Maıbalyq kólinen sý jiberilgen joq. Barlyq sý Nura–Esil ortalyq kanalyna aǵady.

– Maıbalyq kólindegi sý deńgeıi tek jaýyn-shashyn men erigen qar arqyly tolyǵady. Qazirgi ýaqytta kóldegi sý deńgeıi tómendegen. Jaǵdaıdy táýlik boıy Áýe qozǵalysyn izdeý-qutqarý jáne avarııalyq qamtamasyz etý qyzmeti jáne áýejaıdyń aerodrom qyzmeti baqylaýda ustap otyr. Ushý-qoný jolaǵy men áýejaı ınfraqurylymyn sý basý qaýpi joq, – dep tolyqtyrdy baspasóz qyzmeti.

Buǵan deıin elorda áýejaıyn damytýǵa 1,1 mlrd dollar ınvestıtsııa tartylatyny habarlanǵan edi.