Astana áýejaıy halyqaralyq júk tasymalynyń jańa ortalyǵyna aınalmaq
ASTANA. KAZINFORM — Astana halyqaralyq áýejaıy áýeaılaq ınfraqurylymyn damytý men ushý qaýipsizdigin qamtamasyz etý baǵytyndaǵy jumystardy júıeli túrde jalǵastyryp keledi. Búginde aerodrom halyqaralyq talaptarǵa tolyq saı jumys istep, turaqty tehnıkalyq baqylaýda ustalady.
Áýejaı qyzmetin tıimdi uıymdastyrý maqsatynda júk jáne jolaýshylar reısteri ýaqyt boıynsha ońtaılandyrylýda. Bul tásil áýe kemelerine qyzmet kórsetý sapasyn arttyryp, operatsııalyq turaqtylyq pen ushý qaýipsizdigin qamtamasyz etedi.
Ushý-qoný jolaǵynyń jaǵdaıy turaqty baqylaýda. Mamandar júıeli túrde tekserý júrgizip, qajetti jóndeý jumystaryn ýaqtyly atqarady. Sonymen qatar, Qazaqstannyń avıatsııalyq ákimshiligi jyl saıyn aerodrom ınfraqurylymynyń belgilengen talaptarǵa sáıkestigin tekserip otyrady.
— Júk reısteriniń sanyn arttyrý kezeń-kezeńimen, barlyq tehnıkalyq múmkindikterdi eskere otyryp júzege asyrylady. Bul keń fıýzelıajdy júk áýe kemelerin qabyldaýǵa jáne halyqaralyq júk tasymalyn damytýǵa jol ashady. Halyqaralyq júk tasymaldaýshylarymen áriptestikti nyǵaıtý — eldiń tranzıttik áleýetin arttyrýdaǵy mańyzdy qadam. Bul baǵyttaǵy jumystar Memleket basshysynyń kólik-logıstıka salasyn damytý jónindegi tapsyrmasyna sáıkes júrgizilýde. Júk aǵynynyń ósýi jańa jumys oryndarynyń ashylýyna, ınvestıtsııa tartýǵa jáne Astananyń iri avıatsııalyq-hab retindegi rólin kúsheıtýge yqpal etedi, — delingen habarlamada.
2026 jyldyń mamyr aıynda aerodromda josparly jóndeý jumystarynyń kezekti kezeńi sátti aıaqtaldy. Jumys barysynda aerodrom jabyndary qalpyna keltirilip, tańbalar jańartyldy, jaryq-sıgnaldyq júıeler jańǵyrtyldy. Bul sharalar ınfraqurylymnyń senimdi ári qaýipsiz jumysyn qamtamasyz etýge baǵyttalǵan.
Qazirgi tańda perron men rýlej joldarynda josparly jóndeý jumystary jalǵasýda. Barlyq jumystar kestege saı júrgizilip, reısterdiń turaqtylyǵyna áser etpeıdi. Áýejaı shtattyq rejımde jumys istep tur.
Aldaǵy mańyzdy jobalardyń biri — ekinshi ushý-qoný jolaǵyn salý. Bul bastama áýejaıdyń ótkizý qabiletin arttyryp, operatsııalyq turaqtylyqty kúsheıtip, bolashaq ósimge berik negiz qalaıdy.
Eske sala keteıik, 1 maýsymnan bastap Astana áýejaıy qalypty rejımde jumys istep jatyr.
