Astana áýejaıy 20 jylǵa jýyq ózgermegen tarıfti qaıta qaraýdy usyndy
ASTANA. KAZINFORM – Astana halyqaralyq áýejaıy áýe kemelerine turaq ornyn usyný qyzmetiniń 2006 jyldan beri ózgermegen tarıfin qaıta qaraýǵa bastamashylyq jasady.
Qazirgi ýaqytta halyqaralyq baǵyttardy qospaǵanda, áýe kemelerine bazalyq áýeaılaqta turaq ornyn usyný tarıfi ushaqtyń eń joǵary ushý massasynyń ár tonnasyna táýligine 72,05 teńgeni quraıdy. Bul mólsherleme 2006 jylǵy 1 jeltoqsannan beri ózgermegen.
Áýejaı málimetinshe, osy ýaqyt aralyǵynda ınfraqurylymdy kútip-ustaýǵa, jóndeýge, arnaıy tehnıkaǵa, materıaldar men janar-jaǵarmaıǵa, sondaı-aq qyzmetkerlerdiń eńbekaqysyna jumsalatyn shyǵyndar aıtarlyqtaı ósken.
Sonyń saldarynan atalǵan qyzmetten túsetin kiris áýejaıdyń naqty shyǵyndaryn ótemeı otyr.
– Tarıfti qaıta qaraý qajettiligi, eń aldymen, qoldanystaǵy tarıftiń ekonomıkalyq turǵydan negizsiz bolýyna baılanysty. Paıdalaný shyǵyndarynyń turaqty ósýine qaramastan, atalǵan tarıf jıyrma jylǵa jýyq ýaqyt boıy ózgermegen. Osy kezeńde áýeaılaq ınfraqurylymyn kútip-ustaý jáne jóndeý, arnaıy tehnıkalarǵa qyzmet kórsetý, materıaldar men janar-jaǵarmaı satyp alý shyǵyndary edáýir artty. Qazirgi ýaqytta atalǵan qyzmetti kórsetýden túsetin kirister áýejaıdyń naqty shyǵyndaryn ótemeıdi, – delingen áýejaı aqparatynda.
Tarıfti qaıta qaraý «Tabıǵı monopolııalar týraly» zańnamaǵa sáıkes júrgiziledi. Kólik mınıstriniń 2026 jylǵy 16 naýryzdaǵy №66 buıryǵyna sáıkes, bul qyzmet retteletin áýejaı qyzmetteriniń tizbesine engizilgen.
Áýejaı 2027-2031 jyldarǵa arnalǵan jańa tarıfterdi bekitý jóninde ótinim daıyndaǵan. Bul jumys Joǵary aýdıtorlyq palatanyń nusqamasyn oryndaý aıasynda Azamattyq avıatsııa komıtetiniń tapsyrmasyna sáıkes júrgizilip jatyr.
Áýejaı ókilderi bastama barlyq áýejaı alymdaryna qatysty emes ekenin atap ótti. Tek halyqaralyq baǵyttardy qospaǵanda, áýe kemelerine bazalyq áýeaılaqta turaq ornyn usyný qyzmetiniń tarıfi qaıta qaralmaq.
Usynylǵan ózgerister ınfraqurylymdy kútip-ustaý, jóndeý jumystaryn júrgizý jáne jabdyqtardy jańartý shyǵyndaryn óteýge baǵyttalǵan.
Sonymen qatar 2027-2031 jyldarǵa arnalǵan ınvestıtsııalyq baǵdarlama aıasynda áýeaılaq jabyndarynyń jaı-kúıin baqylaıtyn jabdyqtar men arnaıy tehnıka satyp alý josparlanyp otyr.
Jańa tarıftiń naqty mólsheri ázirge jarııalanǵan joq. Ony bekitý týraly túpkilikti sheshimdi ýákiletti memlekettik organ qabyldaıdy.
Aıta keteıik, buǵan deıin Astana áýejaıy ishki reısterde teleskopııalyq trapty paıdalaný tarıfin 1040 paıyzǵa kóterýdi usynǵan bolatyn. Bul bastamaǵa áýe kompanııalary qarsylyq bildirip, tarıftiń kúrt ósýi áýe bıletteriniń qymbattaýyna ákelýi múmkin ekenin eskertken edi.
