Astana áýejaıy 14 maýsymnan bastap jumys ýaqytyn uzartady

ASTANA. KAZINFORM — Áýe tasymaldaýshylarynyń suranysy boıynsha áýejaıdy basqarýshy kompanııanyń tehnıkalyq mamandarynyń jobalyq toby aerodromdaǵy jóndeý jumysynyń tehnologııalyq protsesin ońtaılandyrdy. 

Jazda maýsymdyq suranystyń joǵary bolýyna baılanysty jolaýshylarǵa yńǵaıly bolý úshin áýe tasymalyna 14 maýsymynan bastap áýejaıdyń jumys tártibi kúndelikti tehnıkalyq úzilispen (23:00-den 00:30–ǵa deıin) uzartylady.

Jumys kezinde áýejaı ushý-qoný jolaǵynyń jumysqa jaramdylyǵyn qamtamasyz etedi, keıinnen ushý-qoný jolaǵyna kóshý arqyly áýeaılaq jabynynyń basqa ýchaskelerinde jóndeý jumystary júrgiziledi.

Búginde áýejaıdyń negizgi jumysyna kedergi keltirmeıtin magıstraldi jolaqta jóndeý jumysy júrip jatyr. 

«Áýe tasymalyna degen suranysty qanaǵattandyrý úshin avıakompanııalar ishki reıs kestesin jedel qaıta qarap, tanymal baǵyttarǵa qosymsha reısterdi qamtamasyz etedi. Osyǵan baılanysty jolaýshylar avıakompanııalardyń resmı saıty arqyly bıletterdiń bar-joǵyn teksergeni jón» deıdi áýejaıdyń baspasóz qyzmeti. 

Eske sala keteıik, Astana halyqaralyq áýejaıy 1 mamyrdan beri túngi ýaqytta jumys istemeı kelgen. 

Óıtkeni ushý-qoný jolaǵynda kúrdeli jóndeý jumysy júrip jatyr.  

1 mamyrdan bastap jergilikti ýaqyt boıynsha saǵat 22:00–den 6:00–ge deıin elordalyq áýejaıdyń áýeaılaǵynda ushaq qabyldaý jáne ushý toqtady. 

100-ge jýyq túngi reıs táýliktiń kúndizgi ýaqytyna aýystyrylǵan edi.