Astana áýejaıy 12 mln jolaýshyǵa qyzmet kórsetedi
ASTANA. KAZINFORM – Oljas Bektenov avıatsııalyq hab qurý jónindegi Prezıdent tapsyrmalary aıasynda Astana áýejaıyn damytý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Memleket basshysynyń halyqaralyq avıatsııalyq hab qurý jónindegi mindetteri sheńberinde Astana qalasynyń halyqaralyq áýejaıyn damytý máseleleri jóninde keńes ótkizdi.
Jıyn barysynda Premer-mınıstrge Astana áýejaıynyń ushý-qoný jolaǵyn josparly jóndeý merziminiń aıaqtalǵany týraly baıandaldy. Júrgizilgen jumystar ınfraqurylymnyń senimdiligi men ushý qaýipsizdigin arttyrýǵa baǵyttalǵan. Astana qalasynyń ákimi Jeńis Qasymbek áýe aılaǵynyń materıaldyq-tehnıkalyq bazasyn odan ári rekonstrýktsııalaý jáne nyǵaıtý josparlary týraly habardar etti.
Jobada jańa ushý-qoný jolaǵyn salý, perrondar men termınaldardy jóndeý, tehnıkalyq quraldardy jańartý syndy taǵy da basqa jumystar qarastyrylǵan. Odan bólek, logıstıkalyq keshender, qoımalar, qonaqúıler, keńseler jáne ákimshilik ǵımarattardy qosa alǵanda ınfraqurylymdy damytý josparlanyp otyr. Búgingi tańda áýejaı jylyna 9 mln-ǵa jýyq jolaýshyǵa qyzmet kórsetedi. Jobany júzege asyrý taıaýdaǵy birneshe jylda bul kórsetkishti orta eseppen 12 mln jolaýshyǵa deıin arttyrýǵa múmkindik beredi.
Jıyn barysynda qatysýshylar áýejaıdy odan ári damytý úshin ınvestorlar tartý máselesin talqylady. Іri halyqaralyq korporatsııalar tarapynan qyzyǵýshylyq bary atap ótildi.
Keńes qorytyndysynda Premer-mınıstr Kólik mınıstrligi men Astana qalasynyń ákimdigine elordanyń avıatsııalyq áleýetin damytýǵa baǵyttalǵan jobany júzege asyrý máselesin baqylaýda ustaýdy tapsyrdy.
Aıta ketelik BQO-da qaıtarylǵan aktıvter esebinen 27 joba júzege asyrylyp jatyr.