Astana aýdandary áleýmettik parametrler boıynsha teńestiriledi - ákimdik
ASTANA. QazAqparat - Astananyń barlyq aýdandary 34 áleýmettik parametr boıynsha teńestiriledi. Bul týraly Astana ákiminiń orynbasary Malıka Bekturova «Jibek joly» halyqaralyq birlesken ınnovatsııalar forýmynda málim etti, dep habarlaıdy QazAqparat.
«Ázirge «Smart-Astana» baǵdarlamasy aıasynda 20 joba engizlgen tizim anyqtaldy. Olardyń bir bóligi júzege asyryldy jáne qalǵan bóligi iske asyrylyp jatyr. Olar turǵyndarǵa qalany yńǵaıly etýge baǵyttalǵan. Munda qalanyń qaýipsizdigin qosymsha qamtamasyz etetin beınebaqylaý júıesin qurý sekildi jobalar bar. Sondaı-aq, jaryqtandyrý men energııa-gaz shyǵynyn azaıtý júıesin qurý, qala qurylysy syndy jobalar bar. Qalanyń barlyq aýdandaryn ınfraqurylymǵa birdeı múmkindikpen qamtamasyz etý úshin aýdandar 34 áleýmettik parametr boıynsha teńestiriledi», - dedi M.Bekturova.
Sonymen birge, ákimniń orynbasary elordada energııa shyǵyny men kómirqyshqyl gazyn bólýdi azaıtý boıynsha 50-den astam jobanyń júzege asyrylǵanyn habarlady. Nátıjesinde Astananyń jalpy aımaqtyq ónimindegi energııanyń jumsalý júktemesi 3 paıyzǵa tómendegen. Jáne bilim berý men qaýipsizdik salalarynda memlekettik-jeke seriktestiktiń 8 jobasy boıynsha kelisimder bekitilgen. Qalada 400 gektardan astam park bar, qosymsha 19 saıabaq pen jelekjoldar men botanıkalyq baqtyń qurylys jumystary júrip jatyr. Qala aınalasynda rekreatsııalyq (demalys) aımaq qurý úshin aýmaǵy 25-ten 100 gektarǵa deıin jer telimi bólindi. Sondaı-aq, bızneske qala mańyndaǵy kólderdi qalpyna keltirý usynylyp otyr.
