«Astana-Atyraý» baǵytynda jańa júrdek poıyz qatynaı bastaıdy
Bul týraly «Jolaýshylar tasymaly» AQ baspasóz qyzmetinen habarlady.
Jańa júrdek poıyz «Tulpar-Talgo» vagondarynan quralǵan.
Kompanııa aqparatyna qaraǵanda, jańa poıyzdyń qatynaý merzimdiligi 4 kúnde bir ret. Astanadan Atyraýǵa deıingi barar jol 22 saǵat 57 mınýtty, Atyraýdan Astanaǵa deıingi ýaqyt 22 saǵat 15 mınýtty quraıdy. Poıyzdyń jańa quramy 27 vagonnan turady, onyń 22-si - jolaýshylar vagony, 2-eýi - «Grand» sanatty (eki oryndyq lıýks), 2-eýi - «Bıznes» sanatty (eki oryndyq) jáne «Týrıst» sanatty (tórt oryndyq) 18-i - jolaýshy vagony sondaı-aq, 3 tehnıkalyq, 1 vagon-bar men 1 meıramhana vagony bar. «Grand» sanatty vagonda múmkindigi shekteýli azamattarǵa arnalǵan bir kýpe qarastyrylǵan.
Vagondar «Jolaýshylar tasymaly» AQ jyljymaly quramynyń tehnıkalyq-resýrsyn jańartý jáne arttyrý baǵdarlamasyn júzege asyrý aıasynda satyp alynǵan, 2014 jylǵa deıin taǵy 420 jolaýshylar vagony satyp alynatyn bolady.
Eske sala keteıik, búgingi tańda «Tulpar-Talgo» vagondarynan qurastyrylǵan júrdek poıyzdar 5 marshrýt boıynsha: 2001-2003 jyldardan bastap «Almaty-Astana» baǵytyndaǵy №1/2, «Almaty-Shymkent» baǵytyndaǵy №25/26 poıyzdary, 2012 jyldan bastap «Almaty-2- Petropavl» baǵytyndaǵy №151/152 jáne «Aqtóbe-Astana» baǵytyndaǵy №88/87 poıyzdary qatynaıdy. Ústimizdegi jyldyń maýsym aıynan bastap, «Almaty-2 - Atyraý» baǵytyndaǵy №77/78 júrdek poıyzy jolaýshylar tasymaldaýda.
Jalpy Qazaqstan Respýblıkasynyń kólik ınfraqurylymyn damytý baǵdarlamasyn júzege asyrý aýqymynda 2015 jylǵa deıin «Tulpar-Talgo» zaýytynyń ónimderinen jasaqtalǵan «Astana-Qyzylorda», «Almaty-Aqtóbe» (2014 jyl); «Astana-Zaşıta», «Almaty-Zaşıta» (2015 jyl) júrdek marshrýttaryn iske qosý josparlanyp otyr.
